La Regenza ha approvà la correcziun da l'emprim traject parzial da la via dal Pass dal Flüela sin ina lunghezza da circa 2 kilometers sut il restaurant Tschuggen. Questa emprima part dal project exponì prevesa d'optimar las cumbinaziuns da curvas sco er d'adattar minimalmain il profil traversal da la via. Tras quai vegn la via adattada al traject sutvart tranter Tavau ed il restaurant Alpenrose. Il project custa circa 14 milliuns francs.

Il traject parzial en il sectur da Tschuggen vegn percunter suspendì pervia da differentas protestas. L'Uffizi da construcziun bassa vegn a surlavurar quest traject ensemen cun las protestadras ed ils protestaders.

La Regenza ha approvà la dumonda da la fundaziun ARGO per ina contribuziun chantunala da construcziun a favur dal lavuratori protegì per persunas cun impediments a Casti. Ella ha garantì a la fundaziun ina contribuziun da maximalmain 459 600 francs per remplazzar il stgaudament, per montar in nov implant fotovoltaic sco er per reparar il tetg plat. Ils custs totals da quest project da construcziun èn calculads cun var 655 300 francs.

A Casti porscha la fundaziun ARGO in lieu da lavur protegì a 42 persunas creschidas cun impediments. L'edifizi è vegnì terminà l'onn 1992. Il stgaudament dad ieli ch'era vegnì installà quella giada, ha cuntanschì sia durada da funcziunament maximala e duai ussa vegnir remplazzà tras ina pumpa da stgaudar cun aria ed aua energeticamain effizienta ed ecologica. Ultra da quai duai vegnir montà in implant fotovoltaic per pudair cuvrir il basegn d'electricitad dal lavuratori. Per quest intent sto l'emprim vegnir reparà il tetg plat.