La Regenza ha concedì ina contribuziun d'investiziun a l'Ospital chantunal dal Grischun per la producziun d'in medicament. Ultra da quai ha ella approvà la revisiun parziala da l'Ordinaziun da stipendis ed in project collectiv voluminus per la selvicultura.
Contribuziun chantunala per in lieu da producziun da farmazia a l'Ospital chantunal dal Grischun
A
l'Ospital chantunal dal Grischun ha la Regenza garantì ina contribuziun
d'investiziun da 3 milliuns francs per in agen lieu da producziun da farmazia
en l'edifizi nov H2. La contribuziun vegn garantida e
pajada cun la resalva ch'il credit vegnia approvà dal Cussegl grond. Ils custs
totals per la construcziun dals novs locals correspundents importan var
4,9 milliuns francs.
Las
stretgas en il provediment da medicaments (medischinas e vaccins) s'augmentan
sin l'entir mund, er en Svizra. Pertutgadas èn differentas gruppas da
medicaments, particularmain medicaments cunter il cancer, medicaments per
uffants e vaccins. Bleras formulaziuns svaneschan ultra da quai dal tuttafatg
dal martgà da medicaments, perquai che las firmas da farmazia desistan per
motivs economics da producir preparats cun pli pauca svieuta. Tscherts
medicaments individuals cun dosas spezialas, cunzunt en il sectur da la
medischina d'uffants, n'èn betg venals sin il martgà. L'Ospital chantunal cun
la clinica d'uffants e cun l'oncologia è dependent da pudair producir svelt ed
en la qualitad necessaria ils medicaments che n'èn betg pli d'obtegnair
respectivamain las dosas individualas. L'atgna producziun da medicaments tras
l'Institut per farmazia d'ospital da l'Ospital chantunal è pia pli che mai
indispensabla per il provediment da las pazientas e dals pazients en l'entir
chantun.
© l'Ospital chantunal dal Grischun
A l'Ospital chantunal dal Grischun ha la Regenza garantì ina contribuziun d'investiziun da 3 milliuns francs per in agen lieu da producziun da farmazia en l'edifizi nov H2.
La revisiun parziala da l'Ordinaziun da stipendis resguarda ils svilups finanzials e socials
La Regenza ha approvà la revisiun parziala da
l'Ordinaziun tar la Lescha davart las contribuziuns da scolaziun (Ordinaziun da
stipendis). La finamira da la revisiun parziala è per l'ina d'adattar singulas
disposiziuns a las relaziuns odiernas e per l'autra da resguardar il svilup
dals custs ch'è capità en il fratemp, quai cun adattar correspundentamain las
tariffas sin il cumenzament da l'onn da scolaziun 2023/2024 (di da referenza 1. da fanadur 2023). Plinavant pretenda il
mund professiunal da l'avegnir d'emprender per vita duranta, perquai duai
vegnir cumplettà – entaifer la las pussaivladads legalas – er il circul da las
persunas cun dretg da survegnir contribuziuns.
La Regenza ha approvà la revisiun parziala da l'Ordinaziun tar la Lescha davart las contribuziuns da scolaziun (Ordinaziun da stipendis).
Project collectiv 2023 per la selvicultura
En collavuraziun cun circa 200 proprietarias e
proprietaris da guauds publics e privats ha il chantun elavurà tschintg
programs da tgira regiunals. Quests programs cuntegnan mintgamai ils temas
guaud da protecziun, biodiversitad forestala e cultivaziun dal guaud ordaifer
il guaud da protecziun. Tras las mesiras da tut ils programs vegn a medem temp
er tgirà il guaud sco spazi da viver per ils animals selvadis che vivan en tal
e – nua che quai è pussaivel – augmentada la valur dal guaud. Tras tut las
lavurs previsas resulta – per resumar – il «Project collectiv Selvicultura
2023».
La
Regenza ha approvà quest project collectiv cun custs totals da circa
30,73 milliuns francs. Plinavant ha ella garantì a las proprietarias ed
als proprietaris dals guauds participads contribuziuns chantunalas da totalmain
25,23 milliuns francs. Il project collectiv cumpiglia la tgira da var
3300 hectaras guaud.
En collavuraziun cun circa 200 proprietarias e proprietaris da guauds publics e privats ha il chantun elavurà tschintg programs da tgira regiunals.
Approvà la construcziun da rempars per il Flüelabach a Tavau
La
Regenza ha approvà in project per construir rempars per il Flüelabach en la
vischnanca da Tavau. Dals custs totals da var 650 000 francs surpiglian il
chantun e la Confederaziun – tenor la cunvegna da program da la Nova gulivaziun
da finanzas (NGF) – maximalmain 357 500 francs.
En ils auals da las vals lateralas da la
vischnanca da Tavau existan gia dapi pli ditg deficits da protecziun. Gronds
territoris da la zona da construcziun e dal territori utilisà turisticamain èn
en privel da vegnir inundads. Ils rempars existents han fin 140 onns. Per part
èn ils rempars donnegiads e dovran ina sanaziun. En il rom dal project approvà
vegn construì in uschenumnà «rastè tandem» en il sectur Färich, che po
retegnair fin maximalmain 300 meters cubic laina da grava senza in'accumulaziun
pli gronda da l'aua.
La Regenza ha approvà in project per construir rempars per il Flüelabach en la vischnanca da Tavau.
Approvà la revisiun totala da la planisaziun locala da Runtgaglia
La Regenza ha approvà la revisiun totala da la
planisaziun locala da Runtgaglia, che la vischnanca aveva concludì ils 13 da matg 2022.
En la revisiun da la planisaziun ha la
vischnanca da Runtgaglia examinà ed adattà particularmain las zonas da
construcziun, e quai areguard la grondezza, la dimensiun e l'utilisaziun. Tut en tut ha ella reducì sia zona d'abitar, maschadada e
dal center (ZAMC) per var 3270 meters quadrat. En il plan general da furmaziun
èn plinavant vegnids determinads differents objects sco «objects culturals
degns da protecziun» e trais edifizis sco «edifizis da mantegnair»
respectivamain sco «edifizis remartgabels».
© Comet Photoshopping ScRL / Dieter Enz
La Regenza ha approvà la revisiun totala da la planisaziun locala da Runtgaglia, che la vischnanca aveva concludì ils 13 da matg 2022.
