Per incumbensa da las proprietarias e dals proprietaris da guaud impundan ils manaschis forestals onn per onn blera lavur per tgirar il guaud grischun. L'onn 2022 han els tgirà var 3500 hectaras guaud. En il center èn stads la tgira dal guaud da protecziun ed il mantegniment da la biodiversitad.
Ils manaschis forestals publics e las interpresas forestalas han tgirà l'onn passà 3500 hectaras da tut en tut 216 000 hectaras guaud en il chantun. Ellas han utilisà 370 000 meters cubic laina. Quai è var 10 pertschient dapli che l'onn precedent. Tenor il tagl chantunal annual pon vegnir utilisads en media maximalmain 390 000 meters cubic laina per onn. Dapi l'onn 2016 n'è quest contingent dentant mai pli vegnì exaurì. La media dals ultims 10 onns importa 3800 hectaras guaud. La tgira è vegnida fatga tenor ils princips da la persistenza e da la selvicultura natirala.
La quantitad da la laina che n'è betg vegnida prelevada dal guaud pervia da lavurs forestalas, mabain en consequenza da donns, è restada constanta. L'onn passà ha ella importà 14 pertschient. Cumpareglià cun l'onn avant èn dentant ils donns chaschunads dal bau-scorsa s'augmentads considerablamain (+60 %).
Il guaud da protecziun en il focus
Perquai che mo in guaud stabil e saun porscha la meglra e la pli favuraivla protecziun cunter privels da la natira, è la tgira dal guaud da protecziun puspè stada en il center l'onn 2022. Circa 2400 da las var 122 000 hectaras guaud da protecziun dal Grischun èn vegnidas tgiradas. Quai è ina surfatscha che correspunda a la media dals onns passads. Sin circa dus terzs da las surfatschas tgiradas, pia sin 1850 hectaras, profitan las proprietarias ed ils proprietaris da guaud da contribuziuns da la Confederaziun e dal chantun da tut en tut 14,9 milliuns francs.
Promover la biodiversitad forestala
La cunvegna da program Guaud cun la Confederaziun n'è dentant betg mo decisiva per tgirar il guaud da protecziun, mabain er per mantegnair e per promover la biodiversitad forestala, per tgirar cun la crana a cabel guauds strusch accessibels ordaifer il guaud da protecziun sco er per tgirar il guaud giuven ordaifer il guaud da protecziun.
A favur da la biodiversitad forestala èn vegnidas tgiradas l'onn passà var 370 hectaras guaud; quai èn 8 pertschient damain che l'onn avant. La part principala da la tgira è stada la promoziun da spazis da viver per cots selvadis e giaglinas selvadias, suandada da la revalitaziun da guauds pasculads, da la promoziun da spezias da bostgaglia particularas e d'ulteriurs spazis da viver sco er da selvas da chastagners al sid da las Alps.
In ferm guaud giuven è impurtant
Ordaifer il guaud da protecziun han las lavurantas ed ils lavurants da guaud tgirà 160 hectaras guaud giuven e pia concepì la cumposiziun da las spezias da bostgs. Gist en vista a la midada dal clima è quest ultim punct fitg impurtant. La dretga cumposiziun da las spezias da bostgs gida numnadamain a reducir las ristgas ed uschia ad augmentar la forza da resistenza envers ils privels da la natira.
Fotografia agiuntada:
Infurmaziuns:
Urban Maissen, Kantonsförster, selvicultur chantunal, Uffizi da guaud e privels da la natira, tel. +41 81 257 38 51 (cuntanschibel da las 10.00 fin las 12.00), e‑mail Urban.Maissen@awn.gr.ch
Responsabladad: Uffizi da guaud e privels da la natira