Sin invitaziun da la Regenza grischuna ha la Regenza dal chantun Sursilvania visità ier ed oz il chantun Grischun.
A chaschun da sia visita en il chantun Grischun è la delegaziun da Sursilvania vegnida manada dal president da la Regenza, il landamma Christoph Amstad. El è vegnì accumpagnà dal vicepresident da la Regenza Josef Hess, dals cussegliers guvernativs Christian Schäli e Daniel Wyler sco er da la cussegliera guvernativa Cornelia Kaufmann-Hurschler e da la chanceliera Nicole Frunz Wallimann.
Las duas delegaziuns èn viagiadas ier a Domat, nua ch'ellas han visità la filiala principala da la firma Hamilton Medical. Silsuenter han ellas giudì ina visita guidada tras la citad da Farschno e tras il chastè da Schauenstein. Oz è stada sin il program ina visita en la baselgia da Ziràn ed en la chavorgia da la Viamala. Avant ch'ils giasts èn returnads a Sarnen, han els fatg – sco finiziun da la visita – ina fermada en il Signuradi per in gentar cuminaivel.
La visita da la Regenza dal chantun Sursilvania ha servì en emprima lingia a tgirar las relaziuns amicablas ed a barattar experientschas sin ils champs da la cultura, da l'economia e da la politica.
Fotografias agiuntadas:
Las delegaziuns dal Grischun e da Sursilvania davant il chastè da Schauenstein
President da la Regenza Peter Peyer cun landamma Christoph Amstad
Infurmaziuns:
President da la Regenza Peter Peyer, schef dal Departament da giustia, segirezza e sanadad, e‑mail Peter.Peyer@djsg.gr.ch
Responsabladad: Regenza