Cun il project «ZicZAC» ha il team da planisaders generals cun ils architects da las firmas atelier tsu ScRL da Cuira e studiospazio/bersa inc. da Turitg gudagnà la concurrenza da projects libra per il nov Center d'instrucziun per la protecziun civila a Meiersboda. Igl è previs da cumenzar cun las lavurs da construcziun la primavaira 2025.
Cun ina concurrenza ha il chantun tschertgà in project persistent cun in'architectura d'auta qualitad. Sis teams da planisaders èn s'occupads da la planisaziun d'in nov Center d'instrucziun per la protecziun civila a Meiersboda sin il territori communal da Churwalden e da prender en vista la finamira da netto nulla emissiuns da gas cun effect da serra. Aspects sco la circulabladad, in microclima optimà, ina producziun d'electricitad solara ed in'accumulaziun d'energia duevan medemamain vegnir integrads en la planisaziun.
Decisiun unanima
La giuria è sa fatschentada intensivamain cun las propostas inoltradas ed è sa decidida unanimamain per il project victur «ZicZAC». Il project è vegnì elavurà dal team da planisaders generals / d'architects da las firmas atelier tsu ScRL da Cuira e studiospazio/bersa inc. da Turitg e prevesa in edifizi da lain cun trais plauns. Quest project ha persvadì la giuria cunzunt pervia da la structura clera, il material da construcziun natiral, ils princips da construcziun simpels, il concept «low-tech» per la tecnica da chasa sco er las bleras differentas pussaivladads d'utilisar l'intern da l'edifizi. Il project ch'è vegnì sviluppà sco sistem general, porscha cundiziuns idealas per tegnair quint er a lunga vista dals basegns che sa midan.
«Quest project ademplescha fitg bain tut las pretensiuns giavischadas e persvada cun sia idea cumplessiva e progressiva da construir en moda persistenta», uschia la presidenta da la giuria, la cussegliera guvernativa Carmelia Maissen, scheffa dal Departament d'infrastructura, energia e mobilitad.
Edifizi nov empè da sanaziun totala
Il nov Center d'instrucziun Meiersboda cun in sectur d'alimentaziun, d'instrucziun e d'alloschi duai remplazzar l'edifizi da scolaziun e d'alloschi actual, ch'è vegnì construì ils onns 1975/76. Per motivs economics, da manaschi e da persistenza dovri – suenter in temp da manaschi da stgars 50 onns – in edifizi nov da substituziun. L'analisa da la valur d'utilisaziun sco er calculaziuns da CO2 e da persistenza han mussà, ch'igl è d'avantatg da remplazzar l'edifizi da scolaziun e d'alloschi tras in nov edifizi en il medem lieu empè da far ina sanaziun totala.
Il nov Center d'instrucziun Meiersboda duai cumplettar il stabiliment d'exercizi modern, ch'è vegnì endrizzà per la Protecziun civila e per sias organisaziuns partenarias. L'edifizi nov da substituziun vegn a cumplettar l'areal existent Meiersboda che cumpiglia la halla da deposit e d'instrucziun sco er il lavuratori.
Retratga la primavaira 2027
Durant la sessiun d'avrigl 2024, cura ch'il project da construcziun elavurà è avant maun, duai il Cussegl grond tractar la missiva da construcziun respectiva. Sch'il parlament approva il project, vegn la fatschenta suttamessa il settember 2024 a la votaziun dal pievel grischun. Igl è previs da cumenzar cun las lavurs da construcziun la primavaira 2025 e da retrair il nov Center d'instrucziun la primavaira 2027.
Exposiziun dals projects
A partir dad oz gievgia, ils 8 da zercladur, fin gievgia, ils 15 da zercladur 2023, pon ins contemplar tut ils projects inoltrads en il Center d'instrucziun Meiersboda. L'exposiziun al 1. plaun è averta ils lavurdis da las 8.00 fin las 17.00.
Agiuntas:
Visualisaziun 1 dal project victur «ZicZAC» | © Uffizi da construcziun auta dal Grischun
Infurmaziuns:
- Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, tel. +41 81 257 36 05 (cuntanschibla da las 8.30 fin las 9.00), e‑mail Carmelia.Maissen@diem.gr.ch
- Andreas Kohne, architect chantunal, Uffizi da construcziun auta dal Grischun, tel. +41 81 257 36 31 (cuntanschibel da las 14.30 fin las 15.30), e‑mail Andreas.Kohne@hba.gr.ch
Responsabladad: Regenza