La Regenza è s'occupada ed ha prendì enconuschientscha da duas petiziuns davart il triep da lufs dal Beverin.

L'october 2022 è vegnida inoltrada la petiziun «Prelevaziun immediata dal triep da lufs dal Beverin cunzunt dal luf-bab M92», che pretenda che la Confederaziun ed il chantun declerian il stadi d'urgenza dal luf. Tras la sajettada dal luf-bab M92 il november 2022 è ina da las finamiras da la petiziun gia vegnida cuntanschida. La pretensiun da la petiziun da prelevar tut il triep dal Beverin, na po betg vegnir ademplida, quai pervia da la legislaziun da chatscha ch'è actualmain en vigur.

Il november 2022 è vegnida inoltrada la petiziun «Il triep dal Beverin na dastga betg vegnir extirpà!». Las petiziunarias ed ils petiziunaris pretendan en general, ch'ils animals da rapina gronds stoppian vegnir protegids tenor la Convenziun da Berna, sco er ch'il management dal luf stoppia vegnir realisà en moda confurma a la lescha. En connex cun il luf en il Grischun è la Regenza conscienta da l'impurtanza da la protecziun da las spezias. Las autoritads executivas chantunalas ch'èn incumbensadas cun il management dal luf, observan strictamain las prescripziuns legalas vertentas. Uschenavant che la petiziun pretenda ina realisaziun dal management dal luf che correspunda a la lescha, è ella gia ademplida.