A Claustra cumenzan ils 22 da zercladur 2023 las lavurs da construcziun per il nov edifizi da substituziun per l'allevament da peschs da l'Uffizi da chatscha e pestga. Tras quai vegnan stgaffidas las premissas da spazi e da manaschi per cuntinuar cun l'allevament da peschs. Ultra da quai porscha il nov stabiliment localitads per la controlla da selvaschina.

Tar las incumbensas d'in stabiliment chantunal per l'allevament da peschs tutga la tegnida e l'allevament secundar da peschs-mamma, la pestga e la fructificaziun artifiziala da peschs da frega, il cuar ils ovs, l'allevament da peschs per la repopulaziun e la derasaziun dals peschs giuvens. Il stabiliment per l'allevament da peschs a Claustra è cumpetent per la regiun Partenz sco er per il Landwassertal e la Val d'Alvra.

Nov edifizi da substituziun en il lieu vegl
Il stabiliment per l'allevament da peschs da l'onn 1924, ch'è vegnì cumplettà l'onn 1947 cun ina chasa da cuar e cun lajets, na correspunda betg pli a las pretensiuns odiernas envers il basegn da spazi. Cura che las lavurs da construcziun cumenzan, vegnan l'edifizi existent e la remisa per utensils disfatgs e remplazzads tras in nov edifizi modern cun locals supplementars per la controlla da selvaschina. Tras la concentraziun da tut ils process impurtants al plaunterren èn garantids en l'avegnir andaments da manaschi simpels ed effizients sco er in access senza obstachels. Il nov stabiliment per l'allevament da peschs cumpiglia in local da cuar, in local da pavlar ed in local per la controlla da selvaschina, ina halla cun in batschigl radund, in lavuratori, surfatschas da deposit, in biro cun ina stanza da conferenza e gardarobas. Al plaun sura sa chattan il local da tecnica cun il provediment d'aua ed ulteriuras surfatschas da deposit. Il local per la controlla da selvaschina cumpiglia ina cella frestga ed è accessibel separadamain, uschia ch'el na dependa betg dal manaschi da l'allevament da peschs.

Construcziun da lain funcziunala cun in grond tetg da fotovoltaica
Il nov edifizi è structurà consequentamain tenor stanzas e dividì en zonas da temperatura. Sin il tetg da la simpla construcziun da lain vegn integrà in implant fotovoltaic cun ina prestaziun da circa 68 800 uras kilowatt per onn. Il nov stabiliment per l'allevament da peschs represchenta in construir modern e persistent ed augmenta – tras sia architectura marcanta – la valur dal territori d'abitadi a l'ur da Claustra.

«SpeziFisch» sa numna il project victur
En il rom d'ina procedura da selecziun da planisaders han ils architects D. Jüngling ed A. Hagmann da Cuira persvadì cun lur project «SpeziFisch» (communicaziun a las medias dals 08-07-2021). Sut la direcziun da l'Uffizi da construcziun auta dal Grischun han ils architects elavurà il project preliminar ed il project da construcziun, quai ensemen cun il futur utilisader, l'Uffizi da chatscha e pestga. La fin dal 2021 ha il Cussegl grond approvà il project cun in credit d'impegn da 4 milliuns francs.

Interpresas da la regiun
Oriundamain eri planisà da cumenzar cun las lavurs da construcziun la stad 2022. Pervia da la crisa en l'economia da construcziun e pervia dals pretschs memia auts è il cumenzament vegnì spustà. Oz cumenzan pia las lavurs da realisaziun che duran 1 onn. Las lavurs da la construcziun brutta vegnan ad esser terminadas fin la fin da l'onn 2023. Durant ils mais d'enviern han lieu las lavurs da cumplettaziun. Per realisar il project han ins pudì incumbensar principalmain interpresas da la regiun. En vista a la pestga da peschs da frega durant l'atun vegn il stabiliment ad esser terminà fin la stad 2024. Durant las lavurs da construcziun vegn il stabiliment manà vinavant cun agid da provisoris per il provediment d'aua.

Visualisaziun:

© GYGA SA

Agiunta:

Flyer d'infurmaziun davart la construcziun

Infurmaziuns:

• Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, tel. +41 81 257 36 05 (cuntanschibla da las 12.00 fin las 13.00), e‑mail Carmelia.Maissen@diem.gr.ch
• Andreas Kohne, architect chantunal, Uffizi da construcziun auta dal Grischun, tel. +41 81 257 36 31 (cuntanschibel da las 12.00 fin las 13.00), e‑mail Andreas.Kohne@hba.gr.ch

Infurmaziuns cumplementaras: Stabiliments per l'allevament da peschs en il chantun Grischun

Il chantun Grischun ha tut en tut set stabiliments per l'allevament da peschs (Claustra, Trun, Giuvaulta, San Murezzan, Müstair, Le Prese, Cama). Tuts vegnan manads da l'Uffizi da chatscha e pestga (UCP). L'emprima tratga da peschs en il Grischun han ins prendì en funcziun l'onn 1854 a Samedan. Ella è vegnida manada sin basa privata dal medi local Georg Brügger. Pli ch'in quart tschientaner pli tard, numnadamain l'onn 1891, han ins avert a Seglias l'emprima piscicultura cun sustegn chantunal; ella è dentant restada en possess privat. Il stabiliment per l'allevament da peschs a Claustra, ch'è vegnì construì l'onn 1924, è pia l'emprima e la pli veglia tratga da peschs ch'il chantun Grischun ha construì e manà sez.
En mintga stabiliment per l'allevament da peschs occupa il UCP in survegliader da pestga ed in substitut dal guardiaselvaschina. En ils stabiliments per l'allevament da peschs dal Grischun vegnan tratgas litgivas d'aual, litgivas da lai e litgivas giaglias, namaycushs e litschalas. Vitiers vegn l'allevament da var in milliun peschs per onn per la repopulaziun.
Il consum d'aua per stabiliment dependa dals differents temps da manaschi e da l'occupaziun. Sch'il stabiliment per l'allevament da peschs a Claustra è per exempel en funcziun cun plaina capacitad, importa il consum d'aua en la chasa da cuar bunamain 235 l/min. ed en ils lajets circa 700 l/min.