Bravuogn è oz per uschè dir il center da la Svizra politica. Il chantun Grischun retschaiva la Conferenza da las regenzas chantunalas (CdC) en il Kurhaus. A chaschun dal giubileum da 30 onns n'han las radunanzas plenaras, che han lieu quatter giadas per onn, betg lieu sco usità a Berna, mabain en differentas regiuns da la Svizra.

Tut en il senn dal federalissem han las radunanzas plenaras da la CdC, che vegnan organisadas mintga quartal, betg lieu en la Chasa dals chantuns a Berna, mabain «extra muros» en pliras regiuns dal pajais. La radunanza plenara è l'organ da decisiun suprem da la CdC e sa cumpona da mintgamai ina commembra u in commember da tut las 26 regenzas chantunalas. Sco represchentanza da la Regenza grischuna fa il cusseglier guvernativ Martin Bühler part da la radunanza plenara. Cun ses sez rumantsch permanent en la cumissiun da direcziun da la CdC èsi stà in grond giavisch dal chantun Grischun da dastgar organisar ina tala radunanza da giubileum en il territori rumantsch.

Cun in program accumpagnant captivant e cun in degn lieu d'occurrenza ha il Grischun creà bunas premissas per ina radunanza plenara prosperaivla. Las commembras ed ils commembers da la CdC èn gia viagiads ier saira en il char-salun istoric da la Viafier retica da Cuira a Bravuogn. Suenter ina curta visita guidada tras il Museum da viafier han ellas ed els laschà ir a fin il di en il Kurhaus a Bravuogn.

Fotografias agiuntadas:

Foto 2, Foto 3
© Viafier retica

Infurmaziuns:

Responsabladad: Regenza