La Regenza ha approvà la revisiun parziala da l'Ordinaziun davart la planisaziun dal territori per il chantun Grischun. Ultra da quai ha ella acceptà l'acquisiziun da novs trens ad autotracziun cun roda dentada (ORION) da la Viafier Matterhorn-Gottard.
Premissas severas per pudair approvar tscherts engrondiments necessaris d'edifizis da manaschis stagiunals en la «zona da privel 1»
La Regenza ha approvà la revisiun parziala da
l'Ordinaziun davart la planisaziun dal territori per il chantun Grischun. Cun
las midadas correspundentas vegn realisada ina incumbensa
dal Cussegl grond ch'era vegnida inoltrada en la sessiun d'october 2022. En
la «zona da privel 1» èsi da princip scumandà d'engrondir edifizis e
stabiliments. Sut premissas severas poi dentant excepziunalmain vegnir permess
da far tscherts engrondiments per manaschis stagiunals, numnadamain sch'ils engrondiments
èn necessaris en il rom d'ina renovaziun per motivs da prescripziuns actualas,
particularmain da l'igiena, sche l'utilisaziun na vegn betg intensivada, sche
la situaziun da protecziun vegn tut en tut meglierada e la finala sche
l'utilisaziun è mintgamai limitada ad ina stagiun temporara ordaifer la perioda
privlusa (stagiun da stad en cas da privel da lavinas).
La Lescha davart la planisaziun dal territori
vul impedir che umans ed animals subeschian donn pervia da lur dimora en
edifizis e stabiliments che sa chattan en zonas da grond privel. Quest intent
da protecziun è in interess impurtant da la planisaziun dal territori, ch'è il
motiv per il scumond general da construir e d'engrondir en la «zona da privel 1». Per edifizis e per stabiliments existents che servan a la
dimora d'umans e d'animals vala dentant l'uschenumnada garanzia dal possess,
uschia che tals dastgan vegnir renovads e pia er modernisads. Quai cumpiglia
mesiras da construcziun, tras las qualas l'edifizi po vegnir utilisà vinavant
confurm a l'intent senza intensivar l'utilisaziun ed uschia er vegnir adattà a
las pretensiuns dal temp. Correspundentamain sto la dimensiun da la
modernisaziun admissibla sa drizzar en spezial tenor las pretensiuns envers
l'igiena. Quai pertutga particularmain la cuschina, il deposit sco er las
installaziuns sanitaras. Ils ultims onns èn questas pretensiuns s'augmentadas
cuntinuadamain. En quest rom pon engrondiments urgentamain necessaris per
manaschis stagiunals vegnir permess en il cas singul sut las cundiziuns dadas.
Enderlinhütte SAC
© SAC / Matthias Peier
Promoziun da la transfurmaziun digitala – la Regenza introducescha limitas da custs per contribuziuns
Cun
in'adattaziun dal model directiv da promoziun respectivamain dals criteris da
promoziun per la promoziun da la transfurmaziun digitala en il Grischun
fixescha la Regenza limitas da custs.
Da nov
duain vegnir promovids mo pli projects d'ina tscherta grondezza. Quai vul dir
ch'ils projects ston avair custs imputabels d'almain 100 000 francs. Per
projects da pilot u projects preliminars, per studis sco er per projects da
scolaziun e da furmaziun supplementara vala ina limita da 50 000 francs.
Partind d'ina contribuziun da promoziun dad en media 30 fin 40 pertschient dals
custs imputabels importan las contribuziuns da promoziun pia mintgamai pli che
30 000 respectivamain 15 000 francs.
Questas
limitas da custs han la finamira da focussar e da rinforzar la promoziun sco er
d'augmentar l'efficacitad. Il pajament da bleras contribuziuns fitg pitschnas
na correspunda betg a l'intent da la Lescha davart la promoziun da la
transfurmaziun digitala. Tendenzialmain èn projects pli gronds pli efficazis
per las regiuns e per il chantun. A medem temp èsi sa mussà en la pratica,
ch'ils custs e la lavur tant da vart da las petentas e dals petents sco er da
vart da GRdigital e dal chantun èn memia gronds cumpareglià cun l'effect d'ina
promoziun cun contribuziuns fitg pitschnas. Cun fixar limitas vegnan ultra da
quai er stgaffidas relaziuns cleras per las petentas ed ils petents.
Per incumbensa
dal chantun ademplescha l'Uniun GRdigital differentas lavurs per promover la
transfurmaziun digitala en il Grischun. Ultra da quai accumpogna ella las
petentas ed ils petents, examinescha dumondas e pronunzia recumandaziuns da
promoziun. La decisiun finala davart ina promoziun vegn mintgamai prendida da
la Regenza.
Ulteriuras infurmaziuns: https://grdigital.digital/
Cun in'adattaziun dal model directiv da promoziun respectivamain dals criteris da promoziun per la promoziun da la transfurmaziun digitala en il Grischun fixescha la Regenza limitas da custs.
Approvà l'acquisiziun da novs trens ad autotracziun cun roda dentada da la Viafier Matterhorn-Gottard
La Regenza ha renconuschì l'acquisiziun
d'ulteriurs novs trens ad autotracziun cun roda dentada (ORION) da la Viafier Matterhorn-Gottard sco cunvegnenta e subvenziunabla.
La strategia da flotta da la Viafier Matterhorn-Gottard (VMG) prevesa da remplazzar fin l'onn 2030 il material
rullant vegl tras ina flotta unitara. 12 trens ad autotracziun èn vegnids
furnids e mess en furniziun entaifer il termin previs. En l'avegnir dovri 25 trens ad autotracziun supplementars. Ils novs trens vegnan a circular sin
l'entira rait da la VMG, tranter auter per render pli spess l'urari sur l'Alpsu.
Perquai ha la Regenza approvà ina dumonda da la VMG da cumprar il material
rullant supplementar. Per il chantun resultan var 400 000 francs per onn.
Dapli davart il project «ORION»
© Viafier
Matterhorn-Gottard
La Regenza ha renconuschì l'acquisiziun d'ulteriurs novs trens ad autotracziun cun roda dentada (ORION) da la Viafier Matterhorn-Gottard sco cunvegnenta e subvenziunabla.
Approvà in project collectiv per ovras da protecziun
La Regenza ha approvà il project collectiv
«Reparaziun d'ovras da protecziun 2023» da differentas vischnancas, da la
Viafier retica e da l'Uffizi da construcziun bassa dal Grischun. Plinavant ha
ella concedì ina contribuziun chantunala da circa 5,2 milliuns francs per
realisar quel.
Il project ha la finamira da conservar ovras
da protecziun existentas cunter privels da la natira cun mantegnair il standard
oriund, sco er da meglierar l'effect da quests stabiliments. Questas mesiras da
mantegniment èn indispensablas per mantegnair l'effect da protecziun e per betg
augmentar la ristga da privels da la natira per ils abitadis e per las infrastructuras
da traffic. En il rom dal project collectiv vegnan reparads 25 objects entaifer
2 onns. Tut en tut èn vegnids budgetads 6,9 milliuns francs per
realisar il project.
Glista dals projects d'ovras da protecziun 2023
La Regenza ha approvà il project collectiv «Reparaziun d'ovras da protecziun 2023» da differentas vischnancas, da la Viafier retica e da l'Uffizi da construcziun bassa dal Grischun.
Scumond da charrar cun camiuns sin la via principala a Domat
La Regenza ha pronunzià per emprova in scumond
da charrar cun camiuns sin la via principala 13 tras il vitg da Domat per ina
durada da maximalmain 5 onns. Il scumond da charrar cun camiuns vala davent da
la rundella Favugn fin a la rundella Ovras da Domat. Sche la via naziunala N13
vegn serrada, vegn quest scumond da charrar tras Domat mintgamai abolì a curta
vista per il traffic da transit. En cas da consequenzas negativas po il chantun
sez u sin annunzia da l'Uffizi federal da vias interrumper da tut temp
anticipadamain l'emprova.
Il pli tard suenter la fasa d'emprova da 5 onns vegni examinà, sche respectivamain sut tge premissas che l'ordinaziun da
traffic vegn cuntinuada.
La Regenza ha pronunzià per emprova in scumond da charrar cun camiuns sin la via principala 13 tras il vitg da Domat per ina durada da maximalmain 5 onns.
L'administraziun chantunala promova vinavant l'integraziun da persunas cun impediments
Sco pli gronda patruna en il chantun Grischun
ha l'administraziun chantunala ina funcziun d'exempel per l'integraziun da
persunas cun impediments. En quel senn cuntinuescha ella – sin basa d'in concept surlavurà e senza
limita temporala – cun
l'integraziun da collavuraturas e collavuraturs cun impediments.
Dapi che l'administraziun chantunala ha
lantschà il project l'onn 2009, ha ella fatg 138 contracts d'engaschament cun
persunas cun impediments. La gronda part dad ellas è vegnida engaschada en il
sectur commerzial, in pèr singulas persunas er en la gastronomia.
Sco pli gronda patruna en il chantun Grischun ha l'administraziun chantunala ina funcziun d'exempel per l'integraziun da persunas cun impediments. En quel senn cuntinuescha ella – sin basa d'in concept surlavurà e senza limita temporala – cun l'integraziun da collavuraturas e collavuraturs cun impediments.
