Duas furmaziuns da grip instabilas sur la via d'Engiadina (H27) en l'Engiadina Bassa pudessan daventar ils proxims decennis in privel per las participantas ed ils participants dal traffic. Grazia a la constataziun tempriva tras l'Uffizi da construcziun bassa e tras l'Uffizi da guaud e privels da la natira cumenzan las emprimas mesiras da segirada gia l'avust.
Tranter Martina e Vinadi, visavi l'Ovra electrica cuminaivla En, s'auzan quatter blocs da grip ed in chau da grip vers tschiel. Ils blocs da grip giaschan in sin l'auter ed èn instabils, il chau da grip smanatscha da crudar giu. Per garantir vinavant la segirezza da las participantas e dals participants dal traffic en il sectur Ovella vegnan per part allontanadas respectivamain segiradas questas furmaziuns da grip. Pervia da questas lavurs datti curtas restricziuns da traffic. Las lavurs duran var trais mais.
Urari ed organisaziun dal traffic
Per che las lavurs possian vegnir exequidas en moda segira, sto il vial da la vart da la muntogna vegnir serrà durant las lavurs da construcziun. Dals 7 d'avust fin ils 10 d'october 2023 vegn il traffic manà sin in vial e reglà cun amplas da traffic, quai sin ina lunghezza da circa 300 meters. Durant singuls dis èsi pussaivel che la via vegn serrada curtamain per maximalmain 15 minutas.
Allontanament dals blocs da grip instabils
Ils quatter blocs da grip da differenta grondezza (tranter 2 e 20 meters cubic) èn encugnads in en l'auter sur la via d'Engiadina. Tranter ils blocs sa chattan puncts debels da tavlas da plattamorta. Gia influenzas minimalas pon midar la posiziun dals blocs e far ch'els crodan giu. A lunga vista n'èsi pia betg pussaivel da segirar questa furmaziun, uschia ch'ils blocs ston vegnir allontanads en etappas. Cun ina rait temporara francada vegnan ils blocs segirads durant las lavurs cunter crudadas nunspetgadas. Ultra da quai vegn montada ina rait temporara cunter crudadas da crappa per proteger la via sco er las participantas ed ils participants dal traffic durant las lavurs da nettegiament dal grip.
Segirada dal chau da grip Ovella
Var 150 meters in pau pli al nord ha in chau da grip, che consista da plattamorta da chaltschina, duas grondas sfessas. Quest chau è gia vegnì segirà pli baud cun ancras. La vegliadetgna ed il stadi da questas ancras n'èn betg enconuschents. Igl è probabel che questas ancras disdeschian ils proxims decennis, uschia che parts dal bloc da grip pudessan crudar sin il vial. Per segirar la furmaziun a lunga vista, la cumplettescha l'Uffizi da construcziun bassa – en collavuraziun cun l'Uffizi da guaud e privels da la natira – cun novas ancras a barras permanentas. Sco protecziun cunter eveniments da crudada durant las lavurs da construcziun vegn montada ina rait provisorica sisum il bloc da grip.
Agiunta:
Visualisaziun: plan da situaziun
© WNT Ingenieure
Fotografias agiuntadas:
Infurmaziuns:
- Rafael da Silva, schef dal district 4 Scuol, Uffizi da construcziun bassa, tel. +41 81 257 69 57 (cuntanschibel da las 8.00 fin las 11.00), e‑mail Rafael.Dasilva@tba.gr.ch
- Gian Cla Feuerstein, direcziun regiunala Grischun dal Sid, Uffizi da guaud e privels da la natira, tel. +41 81 257 50 90, e‑mail Gian.Cla.Feuerstein@awn.gr.ch
Responsabladad: Uffizi da construcziun bassa