La Regenza ha approvà il project «Regruppament dal terren (RT) Bondo, averturas agriculas e forestalas» da la vischnanca da Bregaglia ed ha concedì ina contribuziun chantunala da var 652 000 francs.

Pervia da la bova da l'onn 2017 al Piz Cengalo èn resultadas quantitads enormas da material da bova en il territori da Bondo en la vischnanca da Bregaglia. Sin basa dal dretg d'urgenza èn grondas parts dal territori al vest dal vitg da Bondo vegnidas duvradas per deponer il material da bova. Il project prevesa da terminar la sanaziun da las vias forestalas e champestras anc existentas e da puspè allontanar las vias ch'eran vegnidas construidas sin basa dal dretg d'urgenza. La rait da vias champestras cumpiglia tut en tut 1,7 kilometers vias da glera e 0,2 kilometers vias asfaltadas. I sa tracta d'in project forestal ed agricul coordinà. La gronda part cumpiglia la renatiralisaziun da la pista da cupitgaders, ch'era vegnida construida provisoricamain l'onn 2017. Tut en tut vegn recultivada ina surfatscha da vias da 4625 meters quadrat. In'ulteriura demontascha pertutga la punt provisorica e la renatiralisaziun respectiva da la zona umida. La realisaziun dal project dura 3 onns. Ils custs totals èn calculads cun 815 000 francs.

© Donatsch + Partner AG

La Regenza ha concedì a l'Engadin Tourismus SA ina contribuziun chantunala da 266 000 francs per il project digital «Furniturs da prestaziuns sco sellpoints decentrals». Ella ha deliberà questa contribuziun en il rom da la Lescha davart la promoziun da la transfurmaziun digitala en il Grischun. Per ils emprims tschintg onns da gestiun èn ils custs dal project budgetads cun var 959 081 francs (custs d'investiziun e da manaschi).

En il rom dal project «Furniturs da prestaziuns sco sellpoints decentrals» ha l'Engadin Tourismus SA en mira la digitalisaziun consequenta da servetschs, da products e da process relevants per il turissem. Ils furniturs da prestaziuns duain vegnir sustegnids en la transfurmaziun digitala per lung da la chadaina da servetschs turistics, cun la finamira da mantegnair la cumpetitivitad da la regiun turistica er en l'avegnir ed a lunga vista. Er las collavuraturas ed ils collavuraturs duain vegnir perfecziunads en dumondas digitalas. Per entant demussa il project ses effect principalmain en l'Engiadina. A vista mesauna pon dentant er las autras destinaziuns turisticas grischunas profitar dal project.

Ulteriuras infurmaziuns: https://grdigital.digital

© Engadin Tourismus SA

En il chantun Grischun èn las vischnancas responsablas per sanar las fermadas da bus tenor la Lescha federala davart l'eliminaziun dals dischavantatgs envers persunas cun impediments (Lescha davart l'egualitad da persunas cun impediments, LImp). Tenor la LImp ston en spezial installaziuns dal traffic public vegnir adattadas respectivamain endrizzadas fin ils 31 da december 2023 uschia, ch'ellas èn adattadas per persunas cun impediments.

Tras la sanaziun tenor ils basegns da las persunas cun impediments vegn d'ina vart garantì l'access senza obstachels a persunas cun impediments. Da l'autra vart vegn dentant er facilità l'access ad ulteriuras passagieras e passagiers dal traffic public (tranter auter persunas attempadas, famiglias cun charrotschas u viagiaturas e viagiaturs cun bagascha). La Regenza vul accelerar vinavant la sanaziun da las fermadas da bus tenor la LImp e dar in impuls finanzial da durada limitada, quai per sustegnair sanaziuns futuras da fermadas da bus tenor la LImp en il chantun cun contribuziuns da promoziun pli autas (60 pertschient dals custs che resultan pervia da la LImp). Perquai ha ella prolungà fin ils 31 da december 2024 il termin per inoltrar al chantun dumondas per contribuziuns chantunalas pli autas. Exceptadas da quai èn las fermadas da bus che servan unicamain al traffic public local, quai sin basa da la revisiun totala da la Lescha davart il traffic public en il chantun Grischun (LTrP). Tenor las disposiziuns transitoricas da la LTrP pon talas fermadas da bus anc profitar fin ils 31 da december 2023 da contribuziuns chantunalas pli autas. Decisiva è en quest connex la data da l'inoltraziun da la dumonda.

 

© Polizia chantunala dal Grischun

Per realisar l'incumbensa Holzinger-Loretz ha la Regenza concludì l'onn 2021, che studentas e students da la Scola spezialisada superiura per tgira dal Center da furmaziun per la sanadad ed ils fatgs socials (CSS) na vegnan – a partir da l'atun 2023 – betg pli engaschads e salarisads tras la scola, mabain tras ils manaschis. Questa midada da sistem davent dal princip dal lieu da scola vi al princip dal lieu da furmaziun, vegn ad esser terminada en trais onns.

Cun questa chaschun ha la Regenza auzà las pajas da las studentas e dals students da la Scola spezialisada superiura per tgira dal CSS. Cun questa decisiun duai vegnir tegni quint da l'offensiva da scolaziun tenor l'iniziativa «Per in sectur da tgira ferm (Iniziativa da tgira)», ch'è vegnida acceptada ils 28 da november 2021 dal pievel e dals chantuns. Ils custs totals da las pajas per ils proxims trais onns importan var 1,3 milliuns francs e pon vegnir finanziads sur il preventiv global previs dal CSS.