La Regenza ha approvà il project «OSV Val Tuoi» da l'Uffizi da construcziun bassa dal Grischun (UCB). Tenor il project da construcziun importan ils custs per las mesiras previsas tut en tut 317 000 francs.

Suenter ina crudada da blocca la stad 2021 al vest da la Val Tuoi ha il UCB manà tras ina rumida da grippa en quest territori. En il rom dal project qua avant maun vegnan realisadas mesiras a lunga vista suenter in giudicament detaglià dals privels e da las ristgas per garantir vinavant la segirezza da las participantas e dals participants dal traffic. Sin ina lunghezza da 110 meters al vest da la punt sur la Val Tuoi vegn realisada ordavant ina rumida da grippa a maun. Silsuenter duai la paraid-crap da var 30 meters vegnir segirada en la part sura cun duas raits stendidas e cun pliras ancras a barras sin ina surfatscha da var 240 meters quadrat. In toc grip che smanatscha da crudar giu en quest sectur vegn ultra da quai allontanà sut controlla. Ina cuvrida da glera da var 40 centimeters protegia il vial existent da la vart da la muntogna en il sectur da las lavurs da construcziun cunter crudada da craps e da grips.

Per separar il plazzal dal traffic che circulescha vegn montada ina palissada da protecziun. Per montar la palissada da protecziun èsi necessari da serrar la via per in curt temp. Il project vegn realisà en in'etappa da construcziun e duai vegnir terminà l'onn 2023.

 

© BTG Büro für Technische Geologie AG

La Regenza ha approvà ils plans directivs regiunals «Campadis» decidids da la regiun Alvra ils 20 da matg 2022 e da la regiun Malögia ils 26 da schaner 2023. Cun quests plans directivs vegnan fixadas las finamiras e las directivas liantas per las autoritads per sviluppar vinavant campadis existents sco er per planisar novs campadis en omaduas regiuns.

La flaivlezza da la purschida da campadis actuala en la regiun Alvra è la capacitad insuffizienta e per part in'attractivitad mo moderada da las plazzas per passants. Il plan directiv approvà è pia orientà a guidar il svilup futur en la regiun vinavant en direcziun preparaziun da plazzas attractivas supplementaras per passants sco er purschidas innovativas sumegliantas ad in campadi. Avant che la purschida existenta vegn engrondida u avant che novs lieus vegnan en dumonda, ha l'augment da las plazzas per passants prioritad. Cun plazzas attractivas per passants e cun plazzas da staziunament «uffizialas» cumplementaras duai ultra da quai la valurisaziun regiunala vegnir meglierada ed il campar «selvadi» vegnir reducì. Ils cuntegns dal plan directiv, che pertutgan la vischnanca da Surses, vegnan dentant returnads a la regiun per laschar reelavurar. Il basegn per stgaffir ulteriurs campadis en il territori dal Surses è bain incontestà. Ord vista da la planisaziun dal territori èsi dentant necessari da considerar e d'examinar lieus supplementars.

Er en la regiun Malögia è oz gia avant maun ina purschida da basa da pussaivladads da campar. Pervia da la dumonda ch'è creschida sco er pervia da basegns midads e pervia da cundiziuns generalas datti en la regiun differentas stentas per coordinar e per sviluppar vinavant la purschida da campadis. Cun il plan directiv approvà vegnan ussa stgaffidas las premissas per metter a disposiziun in dumber commensurà da plazzas per passants attractivas, bain repartidas territorialmain per giasts da vacanzas e per passantas e passants. Ultra da quai exista la finamira d'augmentar la valurisaziun regiunala, d'obtegnair novs giasts e da mitigiar il problem dal campar selvadi.

La Regenza prenda enconuschientscha dal fatg, ch'i na dat nagina votaziun federala dal pievel ils 26 da november 2023. Il Cussegl federal ha decidì en sia sesida dals 10 da matg 2023 da betg duvrar quest termin da votaziun. Er sin plaun chantunal n'è quel mument previs nagin project da votaziun. Ils 26 da november 2023 n'ha perquai er lieu nagina votaziun chantunala dal pievel.