La Regenza promova la purschida da furmaziun supplementara en il sectur da la transfurmaziun digitala a la Scola auta spezialisada dal Grischun. Ultra da quai ha ella dà glisch verda a la revalitaziun da la zona da recreaziun a Tavau e concedì ina contribuziun chantunala per realisar mesiras per spargnar energia en la Chesa Naira a Samedan.
Il chantun promova la purschida da furmaziun supplementara en il sectur da la transfurmaziun digitala
La Regenza
ha concedì ina contribuziun chantunala da maximalmain 990 000 francs a la
Scola auta spezialisada dal Grischun (SASGR) per manar e per sviluppar vinavant
il program da furmaziun supplementara «Transfurmaziun
digitala@GR». Ella ha deliberà
questa contribuziun en il rom da la Lescha davart la promoziun da la transfurmaziun
digitala en il Grischun.
Ils custs totals per realisar 22 studis da certificat èn budgetads cun tut en
tut 3,14 milliuns francs (custs d'installaziun e da gestiun).
Cun la purschida da furmaziun supplementara
«Transfurmaziun digitala@GR» pon persunas cun activitad da gudogn vegnir
scoladas vinavant en ina moda nunbirocratica ed orientada fitg bain a la
pratica. Questa purschida furma la basa per dumagnar la transfurmaziun
digitala. Il project persvada cunzunt tras l'access nunbirocratic per forzas da
lavur che han fatg in emprendissadi, ma che han in profil professiunal che sa
mida permanentamain pervia da la digitalisaziun. Ultra da quai rinforza il
project la collavuraziun tranter la SASGR e l'economia regiunala.
Ulteriuras
infurmaziuns: https://grdigital.digital/
© SAS Grischun
La Regenza ha concedì ina contribuziun chantunala da maximalmain 990 000 francs a la Scola auta spezialisada dal Grischun (SASGR) per manar e per sviluppar vinavant il program da furmaziun supplementara «Transfurmaziun digitala@GR».
Glisch verda per la revalitaziun da la zona da recreaziun al Lai da Tavau e per l'engrondiment d'ina deponia
La
Regenza ha approvà las revisiuns parzialas da la planisaziun locala che la
vischnanca da Tavau aveva concludì ils 25 da settember 2022 ed ils 23 da mars 2023. D'ina vart ha ella uschia stgaffì las premissas da la planisaziun
d'utilisaziun per revalitar en moda cumplessiva la zona da
recreaziun enturn il Lai da Tavau e
da l'autra vart per adattar l'explotaziun da glera e per engrondir la
deponia en il territori «Tola» sco planisà.
Per las visitadras ed ils visitaders dal Lai
da Tavau duain vegnir purschidas meglras pussaivladads da percepir l'aua, ed en
general duai vegnir augmentada l'attractivitad dal lai e da sia cuntrada. Per
quest intent èn tranter auter previsas ina plattafurma panoramica en il
territori «Seehornwald» ed ina nova senda da viandar tranter l'hotel «Stilli
Park» e la Stillistrasse.
Sin
ina terrassa da glera en il territori «Tola», ch'è situà al sidost dal vitg
Wiesen, vegni explotà glera e sablun dapi ils onns 1960. Las retschertgas
fatgas avant in temp, han mussà, ch'i na pon betg vegnir explotadas las
quantitads ch'ins ha spetgà oriundamain. Anzi, igl è necessari d'adattar il
concept d'explotaziun, quai che chaschuna in engrondiment dal perimeter
d'explotaziun per var 5000 meters quadrat, per ch'i possia vegnir explotà
ulteriur material da glera en la dimensiun da var 120 000 meters cubic.
Plinavant duai star a disposiziun en quest territori ina deponia cun in volumen
uschè grond sco pussaivel per la dismessa regiunala. Cun engrondir la deponia
«Tola» po il basegn da deponer material da la vischnanca da Tavau vegnir cuvrì
previsiblamain fin l'onn 2056.
© Comet Photoshopping ScRL, Dieter Enz
La Regenza ha approvà las revisiuns parzialas da la planisaziun locala che la vischnanca da Tavau aveva concludì ils 25 da settember 2022 ed ils 23 da mars 2023.
Mesiras per spargnar energia en la Chesa Naira a Samedan
La
Regenza ha approvà la dumonda da l'Academia Engiadina per realisar mesiras per
spargnar energia en la Chesa Naira a Samedan e garantì ina contribuziun da
construcziun da maximalmain 252 000 francs per il project da construcziun
planisà.
Ultra da las mesiras gia prendidas è previsa
l'installaziun d'in implant fotovoltaic sin il tetg plat da l'edifizi. Cun la
concepziun previsa dal nov implant fotovoltaic e cun la sanaziun dals mirs
exteriurs da l'edifizi vegn augmentada persistentamain la bilantscha energetica
da la Chesa Naira. Realisada vegn ina surfatscha da var 100 meters quadrat
cun ina prestaziun da 20 kilowatts-peak. En connex cun l'installaziun da
l'implant fotovoltaic vegnan er ils meds d'illuminaziun en la Chesa Naira
remplazzads tras glischs dad LED energeticamain effizientas.
© Academia Engiadina
La Regenza ha approvà la dumonda da l'Academia Engiadina per realisar mesiras per spargnar energia en la Chesa Naira a Samedan e garantì ina contribuziun da construcziun da maximalmain 252 000 francs per il project da construcziun planisà.
Nov med d'instrucziun talian per «economia, lavur, tegnairchasa»
La
Regenza ha approvà l'elavuraziun dals documents tar il med d'instrucziun
«Alltagsstark» per talian. Ils custs per elavurar e per producir il med
d'instrucziun importan circa 870 00 francs.
Fin ussa
ha il Grischun talian stuì instruir ils temas «economia, lavur, tegnairchasa»
(ELT) en il rom «natira, uman e societad» (NUS) senza meds d'instrucziun dal chantun. Per
serrar ina largia en quest nov rom sin il stgalim secundarI, vegn mess a
disposiziun in med d'instrucziun talian. «Alltagsstark» è concepì per
ils temas «economia, lavur e tegnairchasa» dal Plan d'instrucziun21. Il
med d'instrucziun promova las cumpetenzas sin quests champs e mussa
pussaivladads da colliaziun cun ils temas nutriment, sanadad e lavurs
quotidianas.
© KLV/Westermann Svizra
En il rom dal project vegn il med d'instrucziun
«Alltagsstark», ch'è scrit en tudestg, translatà en talian en il layout
original.
La Regenza ha approvà l'elavuraziun dals documents tar il med d'instrucziun «Alltagsstark» per talian. Ils custs per elavurar e per producir il med d'instrucziun importan circa 870 00 francs.
