Dals 15 da matg fin ils 15 da zercladur 2024 han lieu en tut la Svizra dis d'acziun che stattan sut l'ensaina dals dretgs da las persunas cun impediments. Avant 10 onns ha la Svizra suttascrit la Convenziun da l'ONU davart ils dretgs da las persunas cun impediments e dapi 20 onns è en vigur la Lescha davart l'egualitad da persunas cun impediments. Il Grischun appellescha a las uniuns, organisaziuns, instituziuns ed interpresas da sa participar activamain als dis d'acziun.
L'onn 2024 è in onn impurtant per ils dretgs da las persunas cun impediments en Svizra. Da festivar datti gist dus terms impurtants sin la via a l'inclusiun da las persunas cun impediments. L'onn 2014 ha la Svizra ratifitgà la Convenziun da l'ONU davart ils dretgs da las persunas cun impediments. E da l'onn 2004 datescha la Lescha davart l'egualitad da persunas cun impediments che ha da sia vart la finamira d'eliminar dischavantatgs envers las persunas cun impediments. Cun ils Dis d'acziun naziunals 2024 duain tuts dus terms impurtants survegnir la renconuschientscha adequata.
Render visibels ils dretgs da las persunas cun impediments
Durant ils Dis d'acziun naziunals 2024 organisescha mintga chantun atgnas occurrenzas. La finamira dals Dis d'acziun è quella, da mussar a la vasta populaziun, co ch'il futur inclusiv po sa preschentar e vegnir realisà en differents secturs da la vita. Cun differents temas, sco per exempel l'access al sport ed a la cultura, l'inclusiun en il turissem, en la furmaziun u en la lavur, duai vegnir promovida la sensibilisaziun dals uffants e da las persunas creschidas
Ils Dis d'acziun 2024 vegnan iniziads da l'Uffizi chantunal dal servetsch social. Las organisaziuns ed interpresas interessadas annunzian lur interess per plaschair fin ils 30 da settember e‑mail aktionstage@soa.gr.ch.
Agiunta:
Logo dals Dis d'acziun per ils dretgs da las persunas cun impediments 2024
Infurmaziuns:
Daniel Kistler, manader Integraziun da persunas cun impediments, Uffizi dal servetsch social, tel. +41 81 257 26 63, e‑mail Daniel.Kistler@soa.gr.ch
Responsabladad: Uffizi dal servetsch social