A partir dad oz è en funcziun il nov sistem d'infurmaziun dal Cussegl grond (RIS) sin la pagina d'internet dal Cussegl grond. Suenter ina fasa da project dad 1 onn pon ins consultar a partir d'immediat dapli infurmaziuns davart las deputadas ed ils deputads, davart l'organisaziun, davart las fatschentas e davart las sessiuns.

Sur la pagina d'internet e sur il RIS, ch'è da nov integrà en la pagina, pon tut las gruppas d'interess s'infurmar en moda cumplessiva davart il Cussegl grond e davart sia lavur, quai sin ina plattafurma moderna e facila d'utilisar cun in vast cuntegn. Intgins cuntegns da la veglia pagina èn vegnids surpigliads ed integrads en la nova pagina, auters cuntegns èn vegnids concepids cumplettamain da nov. Il RIS è plinavant collià cun la gestiun interna da las fatschentas, uschia ch'il Secretariat dal Cussegl grond po reducir redundanzas existentas.

Novas funcziuns
Sur il RIS pon ins da nov filtrar la tschertga d'infurmaziuns davart las deputadas ed ils deputads, davart las cumissiuns e davart las fatschentas. Ultra da quai pon ins consultar il status actual da las intervenziuns. E plinavant stattan ussa er a disposiziun dapli infurmaziuns davart mintga commembra e commember dal Cussegl grond.

Il sistem d'infurmaziun è vegnì sviluppà dal Secretariat dal Cussegl grond en collavuraziun cun la Chanzlia chantunala, l'Uffizi d'informatica sco er cun purschiders da software externs.

Dapli infurmaziuns:

Pagina d'internet dal Cussegl grond

Auskunftsperson:

Patrick Barandun, manader dal Secretariat dal Cussegl grond, Chanzlia chantunala, tel. +41 81 257 22 32, e‑mail Patrick.Barandun@staka.gr.ch

Responsabladad: Chanzlia chantunala / Secretariat dal Cussegl grond