La Regenza ha prendì posiziun tar in project da consultaziun dal Departament federal da finanzas concernent mesiras da distgargia budgetara a partir dal 2025. Il Cussegl federal vul uschia ademplir las prescripziuns dal frain a l'indebitament er a partir da l'onn 2025.

Ils 22 da settember 2023 – a chaschun d'ina radunanza plenara da la Conferenza da las regenzas chantunalas (CdC) – han ils chantuns deliberà ina posiziun consolidada tar il sboz preschentà. Las regenzas chantunalas renconuschan il basegn d'agir da la Confederaziun. Ellas sa defendan dentant cunter in indossament da las grevezzas als chantuns. Perquai refusan ellas la reducziun previsa da la cumpart chantunala a la taglia federala directa. A medem temp pretendan ellas, che la Confederaziun desistia da reducir la finanziaziun dal traffic regiunal da persunas.

La Regenza grischuna sustegna questa posiziun da la CdC e supplitgescha il Cussegl federal da resguardar tut las infurmaziuns e tut las objecziuns ch'èn menziunadas en la posiziun, cura ch'el evaluescha ils resultats da la consultaziun ed elavura ulteriuramain il project.

Posiziun Conferenza da las regenzas chantunalas

La Regenza ha approvà il project d'exposiziun per la correcziun da la via dal Pass da Spleia sin il traject «In da kurza Chera» fin «Galerie». Il traject d'ina lunghezza da circa 2,6 kilometers na correspunda betg pli als basegns actuals ed a las pretensiuns da segirezza. Pervia da la surstructura da la via senza protecziun cunter la schelira ha la via plinavant defurmaziuns. Per part dovran las construcziuns artifizialas (mirs, punts) medemamain ina sanaziun. Las emprimas quatter stortas davant il cumenzament dal project sco er il traject davent da la fin dal project fin sin il pass èn gia vegnids renovads.

En il rom dal project èsi previs da mantegnair la substanza architectonica da gronda valur, da renovar la surstructura sco er da meglierar, sche pussaivel, la geometria. L'entira lunghezza dal project vegn engrondida sin ina ladezza dals vials da 5,2 meters plus in schlargiament da las stortas? e sa drizza tenor la ladezza maximala existenta dal stabiliment actual. Il schlargiament necessari vegn fatg resguardond la substanza architectonica da gronda valur – la via dal Pass da Spleia è registrada sco traject d'impurtanza naziunala en l'Inventari da las vias da communicaziun istoricas da la Svizra. Ils custs totals da quest project èn budgetads cun 18,95 milliuns francs.