Il Program da turissem dal Grischun 2014–2023 scada la fin da l'onn. Ins po dir ch'il program da 10 onns ha gì success. El era vegnì lantschà da la Regenza per dar impuls cun cleras finamiras a l'economia turistica. Cun la fin dal program, vegn er schlià il Cussegl turistic dal Grischun. A partir d'immediat stat a disposiziun in'analisa da la situaziun ch'il Cussegl turistic dal Grischun ha elavurà sco agid d'orientaziun per il turissem grischun.

Avant 10 onns ha la Regenza grischuna lantschà il «Program da cooperaziun per il turissem grischun». Questa iniziativa per promover la cooperaziun tranter ils acturs turistics e l'innovaziun, scada la fin da l'onn 2023. La finamira dal program eri da rinforzar l'interacziun tranter ils differents furniturs da prestaziuns e da promover la forza innovativa da las destinaziuns, da render cumpetitivs lur products e da plazzar uschia il Grischun sin ina posiziun prominenta en ils conturns turistics naziunals ed internaziunals. Cun il program han ins pudì sustegnair passa 70 projects cun in volumen da promoziun da 15,5 milliuns francs. Er in'analisa da la firma Econcept SA conferma il success ed attestescha al program da promoziun in grond effect integrativ ed interdisciplinar.

Il Cussegl turistic dal Grischun vegn schlià
Il Cussegl turistic dal Grischun è vegnì stgaffì per gestiunar strategicamain il program sco gremi independent per cussegliar la Regenza grischuna. Cun la fin dal program, vegn er schlià il Cussegl turistic dal Grischun. Il gremi consista dad 8 commembers e vegn presidià dapi il fanadur 2020 da prof. Thomas Bieger (Universitad da Son Gagl). Ses antecessur è stà prof. Ernst A. Brugger, che ha manà il Cussegl turistic dal schaner 2014 fin il zercladur 2020 e che vala sco iniziant dal «Cudesch alv per il turissem grischun». Questa collecziun da tesas e d'impuls concrets per l'economia turistica dal Grischun è vegnida publitgada l'onn 2017.

Agid d'orientaziun per il turissem grischun
L'«Analisa da la situaziun per il turissem grischun» ch'il Cussegl turistic ha ussa preschentà, sa referescha al Cudesch alv. Ella mussa schanzas e privels per il turissem grischun e serva sco agid d'orientaziun. En la publicaziun, che cumpiglia 20 paginas, vegnan skizzads ils champs d'acziun impurtants e trends sco er formuladas recumandaziuns d'agir. Grazia a sia diversitad da la purschida e grazia a la gronda surfatscha dal chantun, ha il turissem grischun avantatgs economics substanzials che ston er en l'avegnir vegnir tratgs a niz cun cleras finamiras.

Instruments da promoziun per il turissem èn disponibels er vinavant
Suenter la terminaziun dal Program da turissem dal Grischun 2014–2023 metta il chantun er vinavant a disposiziun instruments da promoziun concrets. En spezial il proxim program da realisaziun da la Nova politica regiunala (NPR) dal chantun Grischun prevesa differents champs tematics, uschia ch'igl è er vinavant pussaivel da promover projects innovativs e projects d'acturs turistics che cumpiglian pliras destinaziuns cun contribuziuns chantunalas. L'Uffizi per economia e turissem accumpogna er en l'avegnir activamain il svilup turistic e regiunal en il chantun Grischun.

Agiunta:

Analisa da la situaziun per il turissem grischun

Infurmaziuns:

• Cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 23 01 (cuntanschibel da las 13.00 fin las 14.00), e‑mail Marcus.Caduff@dvs.gr.ch
• Prof. dr. Thomas Bieger, president dal Cussegl turistic dal Grischun, tel. +41 79 681 55 49 (cuntanschibel da las 11.30 fin las 13.00), e‑mail Thomas.Bieger@unisg.ch

Responsabladad: Regenza

Curt e concis: L'output dal Program da turissem dal Grischun 2014–2023

Dal 2014 fin il settember 2023 ha la Regenza grischuna respectivamain il Departament d'economia publica e fatgs socials approvà tut en tut 71 projects en il rom dal Program da turissem dal Grischun. A 37 projects da terzs acturs èn vegnidas concedidas contribuziuns. 34 projects ha il chantun inizià sez e laschà realisar da terzas persunas. Circa quatter tschintgavels dals meds da promoziun garantids èn vegnids assegnads sco contribuziuns a projects da terzs acturs. La gronda part dals projects (21) èn vegnids promovids entaifer il champ tematic «svilup da products e dal martgà». I suondan ils champs tematics «svilup da l'economia locala» (20 projects) ed «innovaziun da sistems» (15 projects). Main che 10 projects promovids derivan dals champs tematics «management da savida» e «perspectivas da destinaziuns existentas». Tut en tut èn vegnids investids var 3,1 milliuns francs en il «svilup da l'economia locala» e stgars 1,8 milliuns francs en l'«innovaziun da sistems». Al champ tematic «perspectivas da destinaziuns existentas» èn vegnids concedids circa 660 000 francs ed al champ tematic «management da savida» var 500 000 francs.

Projects promovids e scleriments currents, stadi dals 12-09-2023