La Regenza ha approvà in project per la correcziun da la Via sursilvana a Laax. Sin il traject d'ina lunghezza da var 840 m tranter ils access Marcau e Seehof è la via stretga e na correspunda betg al profil traversal regular tenor il program da construcziun da vias. Per velocipedistas e velocipedists è il profil traversal existent privlus. Cunzunt il trassé disfavuraivel da la via da colliaziun (Via da Falera) che sa sparta en il sectur da l'access Seehof, chaschuna entradas privlusas en la via principala (Via sursilvana).

La via vegn schlargiada principalmain da la vart da la val, quai cun in vial da velo en direcziun Flem. Quai è necessari pervia da las relaziuns topograficas e pervia da la surbajegiada da la vart da la muntogna. Pervia dal schlargiament da la via dovri novas construcziuns da sustegn. Il project cumpiglia er la construcziun da novs passapes tras la vischnanca da Laax. En il sectur da l'access Marcau è previs in nov passape da la vart da la muntogna per lung da la via principala. Il passape tranter ils access Marcau e Seehof vegn construì senza interrupziun da la vart da la val, per lung da la via chantunala. Ils custs totals dal project importan circa 14 milliuns francs. La cumpart da la vischnanca da Laax importa circa 1 milliun francs. Cuntegnidas en quella èn ils custs per il vial per ir a sanestra, per ils passapes, per la fermada da bus e per la plazza per deponer naiv.

Coordinà cun questa correcziun da la via è vegnì elavurà – per incumbensa da l'Uffizi da construcziun bassa – in project da sanaziun cunter canera per la Via sursilvana e per la Via da Falera (omaduas vias chantunalas) sco er per differentas vias communalas da la vischnanca da Laax. Quest project separà vegn medemamain approvà da la Regenza. Ella dat uschia tranter auter la permissiun da reducir la sveltezza maximala generala a tempo 50 sin la Via sursilvana tranter la rundella Lag Isla e la cruschada Via Runs. Ultra da quai vegn reducida en l'avegnir la sveltezza maximala a tempo 60 sin la Via Murschetg, davent da la rundella sper il Lag Isla fin a l'hotel Signina. En il rom dal project vegnan plinavant remplazzadas en tscherts lieus las cuvridas existentas da la via tras cuvridas che reduceschan la canera. Ultra da quai vegnan montadas fanestras isoladas cunter canera en intgins objects. Ils custs totals da quest project da sanaziun cunter canera èn calculads cun var 92 500 francs.

Cun il stadi actual datti per lung da las duas vias chantunalas sin il territori da la vischnanca da Laax 54 surpassaments da l'uschenumnada limita d'immissiuns (LI) (quai pertutga 888 persunas). En 27 cas vegn cuntanschida u surpassada la valur d'alarm (quai pertutga 454 persunas). Per lung da las vias communalas examinadas na datti nagins surpassaments da la LI.

La Regenza ha concedì a la Fundaziun Ospital chantunal dal Grischun ina contribuziun chantunala da maximalmain 1,84 milliuns francs per il project digital «Distgargiar e segirar la qualitad da la tgira cun virtualisar cuntegns da scolaziun». Ella ha deliberà questa contribuziun en il rom da la Lescha davart la promoziun da la transfurmaziun digitala en il Grischun. Ils custs totals da quest project importan circa 4,74 milliuns francs.

Il project ha la finamira da manar tras en l'avegnir las scolaziuns per tgirunzas e tgirunzs cun agid da la realitad virtuala. Uschia duai esser pussaivel da distgargiar las persunas spezialisadas qualifitgadas d'incumbensas da scolaziun, da flexibilisar ils temps da scolaziun sco er da simplifitgar l'introducziun da novas collavuraturas e collavuraturs. La finala vegnan spetgads in augment considerabel da l'effizienza, ina distgargia da las tgirunzas e dals tgirunzs ed in augment da la qualitad dal provediment da tgira e da la segirezza da las pazientas e dals pazients.

«PixrealitiesTM» è ina soluziun da plattafurma virtuala da la firma Pixelmolkerei SA da Cuira, ch'è sa spezialisada sin trenaments virtuals, independents dal lieu e dal temp, per il persunal medicinal spezialisà. La firma transfurma il cuntegn da scolaziun en ina furma virtuala. Al letg da tgira virtual emprendan las tgirunzas ed ils tgirunzs cun agid d'egliers da video che als mainan en moda automatisada tras il program da scolaziun. La scolaziun duai esser concepida en moda interactiva, per che las collavuraturas ed ils collavuraturs possian gidar a reflectar activamain ed internalisar las acziuns ed ils moviments correspundents.

Ulteriuras infurmaziuns: https://grdigital.digital/

Pixelmolkerei SA