Il venderdi suentermezdi, ils 10 da november 2023, a partir da las 16.00, avra l'Uffizi da construcziun bassa dal Grischun puspè la via dal Bernina per il traffic. A partir da lura è la via puspè charrabla sin in vial senza restricziuns da temp.

Grazia a las bunas cundiziuns da l'aura ha l'Uffizi da construcziun bassa dal Grischun (UCB) pudì lavurar cun tutta intensitad vi da la segirada e vi da la rumida da la via dal Bernina. Venderdi, a partir da las 16.00, po la via perquai puspè vegnir averta per il traffic sin in vial e senza restricziuns da temp. Pervia dal plazzal vegn il traffic reglà cun amplas.

Ulteriuras mesiras pon vegnir prendidas durant che la via è averta
Ils dis passads ha il UCB realisà differentas mesiras per segirar la spunda sur la via dal Bernina, tranter auter la montascha da palissadas da protecziun sco er l'installaziun da retegnidas da bostgs. Oz gievgia sco er damaun venderdi vegnan montadas sur la via raits cunter crudadas da crappa sin ina lunghezza da var 40 meters. Ulteriuras mesiras vegnan realisadas durant las proximas emnas. Questas lavurs n'han nagina influenza sin il traffic e pon vegnir exequidas durant che la via è averta.

Infurmaziuns actualas chattais Vus da tut temp sut www.strassen.gr.ch.

Agiuntas:

Communicaziun a las medias da glindesdi, ils 6 da november 2023

Fotografia:

Preparativas per la montascha da las raits cunter crudadas da crappa

Infurmaziuns:

Jan Kamm, schef dal district 3 Samedan, Uffizi da construcziun bassa dal Grischun, tel. +41 81 257 68 07, e‑mail Jan.Kamm@tba.gr.ch (cuntanschibel fin las 17.30)

Responsabladad: Uffizi da construcziun bassa