La Regenza ha approvà in project per la correcziun da la via da Samignun en il sectur dal tunnel Val Cotschna. Quest project da via è in da quatter projects da tunnels sin in traject da var 3,5 kilometers lunghezza tranter Vinadi ed Acla da Fans. Ils quatter projects han l'intent da guntgir in lieu fitg privlus – il lieu cardinal cun las vals lateralas Val Pischöt, Val Alpetta, Val Cotschna e Val Mundin è expost als privels da la natira e suttamess a diversas restricziuns areguard il pais ed areguard l'autezza respectivamain la ladezza dals vehichels. Sco emprima etappa da renovaziun ha il tunnel Val Pischöt pudì vegnir surdà al traffic gia ils 14 da december 2017. Il tunnel Val Alpetta è actualmain en la fasa da construcziun. Suenter la terminaziun dal tunnel Val Cotschna èsi plinavant previs da realisar il tunnel Val Mundin.

Il project dal tunnel Val Cotschna cumpiglia la renovaziun d'in traject da circa 1,2 kilometers lunghezza sin la via da colliaziun actuala. Davent dal cumenzament dal project vegn la via cumplettada e schlargiada sin ina lunghezza da circa 270 meters cun agid d'in mir da sustegn da la vart da la val. La part centrala dal traject da renovaziun è il nov tunnel Val Cotschna cun ina lunghezza da var 610 meters. Tras quest nov tunnel sviescha la futura via da Samignun la Val Cotschna, la Val Sablunera e la Val Drosa. Il traject avert d'ina lunghezza da circa 295 meters a la fin dal project vegn medemamain renovà e schlargià da la vart da la val cun dus novs mirs da sustegn. La via (traject avert) vegn schlargiada ad ina ladezza da 5,8 meters. En il tunnel importa la ladezza da la via dapertut 7 meters. Ils custs per il nov tunnel Val Cotschna importan var 39,2 milliuns francs.

La Regenza ha approvà il project per renovar la via da la Lumnezia sin il traject entaifer il vitg da Lumbrein. Sin quest traject d'ina lunghezza da var 700 meters è la via isada e sto vegnir sanada. La cuvrida existenta ha sfessas, defurmaziuns sco er sbassadas e na correspunda betg pli a las pretensiuns d'ozendi. La segirezza da las pedunas e dals peduns è per part garantida mo insuffizientamain. En tscherts lieus n'è la situaziun betg survesaivla avunda per las participantas ed ils participants dal traffic.

Quest project prevesa da renovar la via sin tut il traject dal project. En cumparegliaziun cun il profil normal po il vial en il center dal vitg da Lumbrein avair mo ina ladezza restrenschida (ladezza dal vial variabla). Perquai survegnan ils vehichels la pussaivladad da sa cruschar entaifer mintgamai circa 50 meters. Las vias lateralas, ils passapes, las plazzas davant chasa sco er las entradas e las sortidas existentas vegnan adattadas correspundentamain al trassé vertical nov. Er differents projects communals fan part da questa renovaziun: la construcziun d'in nov passape d'ina lunghezza da circa 275 meters, la sanaziun da la fermada da bus tenor ils basegns da las persunas cun impediments sco er il remplazzament dals conducts d'aua. Ils custs totals da quest project importan circa 3,52 milliuns francs. Da questa summa sto la vischnanca pajar var 564 000 francs per ils projects communals.

La Regenza ha approvà la revisiun parziala da la planisaziun locala dad Arosa, che la vischnanca aveva concludì ils 15 da matg 2022. Uschia vegnan stgaffidas las premissas planisatoricas per meglierar l'ennavada e l'utilisaziun da las pistas en il territori «Tschuggen-Weisshorn» sco er l'utilisaziun dal territori «Tschuggen» durant la stad.

La revisiun da la planisaziun locala cumpiglia adattaziuns da la zona da sport d'enviern, da la zona da protecziun dal guaud e da la selvaschina sco er da l'ennavada en il territori da skis dad Arosa. Ultra da correcturas dal terren chaschunan questas adattaziuns er runcadas.

© Comet Photoshopping GmbH, Dieter Enz (2009)

La Regenza ha prendì enconuschientscha dal fatg ch'ils suandants projects federals vegnan suttamess a la votaziun dal pievel dumengia, ils 3 da mars 2024:

• Iniziativa dal pievel dals 28 da matg 2021 «Viver meglier en la pensiun (Iniziativa per ina 13avla renta da la AVS)»;
• Iniziativa dal pievel dals 16 da fanadur 2021 «Per in provediment da vegliadetgna segir e duraivel (Iniziativa da rentas)».

Sin plaun chantunal n'èn previs nagins projects da votaziun ils 3 da mars 2024.