Suenter ina durada da 5 mais e mez è l'exposiziun publica dal Plan directiv Energia ida a fin ils 30 da settember 2023. In pau dapli che 300 persunas ed instituziuns han prendì posiziun ed inoltrà var 3200 singulas propostas. La gronda part da las propostas pertutga, sco spetgà, la forza idraulica e l'energia da vent.

L'analisa mussa che circa in terz da las propostas sa referescha a la forza idraulica e circa in ulteriur terz a l'energia da vent. Il terz restant sa reparta sin ils temas strategia d'energia e protecziun dal clima, implants solars, ulteriuras funtaunas d'energia indigenas, transport, distribuziun ed accumulaziun d'energia sco er sin remartgas generalas. Da las totalmain 301 posiziuns derivan 41 da vischnancas, 8 da regiuns, 9 da chantuns vischins, 9 da partidas politicas, 165 da persunas privatas, 53 da federaziuns e d'organisaziuns sco er 16 d'ulteriuras varts.

In'emprima examinaziun mussa differentas posiziuns
Tar la forza idraulica, cunzunt tar la determinaziun dals trajects d'aua, sa mussan cleramain las differentas posiziuns da las aderentas e dals aderents d'ovras electricas d'ina vart e dals circuls per la protecziun da l'ambient da l'autra vart. Tuttas duas varts crititgeschan che lur interess vegnian resguardads memia pauc en il plan directiv. Il Plan directiv Energia enumerescha per l'ina las ovras idraulicas cun consequenzas gravantas per il territori e per l'ambient. Per l'autra designescha el – confurm a l'incumbensa da la legislaziun federala – ils trajects d'aua ch'èn adattads per l'utilisaziun da la forza idraulica ed enumerescha ils trajects d'aua ch'èn da tegnair liber.

Tar la forza dal vent predomineschan las propostas che s'expriman cunter la forza dal vent en general u cunter singuls territoris. Differentas vischnancas, regiuns ed ulteriuras posiziuns vesan dentant er ina schanza en questa furma da producir energia ed en territoris d'energia da vent. I dat er posiziuns che proponan d'integrar ulteriurs territoris d'energia da vent en il plan directiv. Sin basa d'ina consideraziun dals interess tranter criteris d'utilisaziun e da protecziun èn vegnids preschentads, ord vista spezialisada, tut en tut 25 territoris d'energia da vent en il sboz dal plan directiv. Quests territoris èn vegnids attribuids a duas prioritads.

Il proceder dependa da las decisiuns sin plaun naziunal
Dapi il cumenzament da l'exposiziun publica èn vegnidas inoltradas var 3200 propostas. Quellas vegnan ussa evaluadas ed analisadas detagliadamain tenor criteris spezialisads fin l'emprima mesadad da l'onn 2024.

L'ulteriur proceder en connex cun il sboz dal plan directiv e cun las propostas inoltradas dependa er da dus projects da lescha sin plaun naziunal. Per l'ina sa tracti da l'uschenumnà decret general: Questas revisiuns da la Lescha d'energia e da la Lescha davart il provediment d'electricitad portan ina midada da l'ovra reglamentara surordinada e da la situaziun dals interess en cumparegliaziun cun il temp da l'elavuraziun dal plan directiv. Cunter quest decret general èsi vegnì fatg in referendum. Mez schaner 2024 vegni ad esser enconuschent, sch'i èn vegnidas rimnadas avunda suttascripziuns e sch'i vegn votà davart il decret general.

Per l'autra dependa l'ulteriur proceder er da l'uschenumnà «Project davart l'acceleraziun da las proceduras per las energias regenerablas». Questa nova proposta dal Cussegl federal vul «accelerar» las proceduras e prevesa per quest intent ina midada da las proceduras da permissiun. La debatta parlamentara en chaussa ha pir anc lieu. Er quai pudess purtar ina midada da l'ovra reglamentara e cunzunt dal dretg da cundecisiun, cuntrari a quai ch'era definì avant l'elavuraziun dal sboz dal plan directiv. Per tractar las objecziuns da vischnancas, d'organisaziuns e da persunas privatas vegni ad esser impurtant, co che questas duas disposiziuns surordinadas vegnan a sa sviluppar.

Infurmaziuns:

• Cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 23 01 (cuntanschibel da las 14.15 fin las 15.15), e‑mail Marcus.Caduff@dvs.gr.ch
• Jacques Feiner, manader Planisaziun directiva chantunala, Uffizi per il svilup dal territori, tel. +41 81 257 23 37 (cuntanschibel da las 13.30 fin las 14.30), e‑mail Jacques.Feiner@are.gr.ch
• Beat Hunger, manader Forza idraulica, Uffizi d'energia e da traffic, tel. +41 81 257 36 26 (cuntanschibel da las 13.30 fin las 14.00), e‑mail Beat.Hunger@aev.gr.ch

Responsabladad: Uffizi per il svilup dal territori