Las medias ed ils medis che pratitgeschan libramain en ils chantuns Appenzell Dadens, Appenzell Dadora, Glaruna, Grischun, Schaffusa, Turgovia e Son Gagl èn dapi il 1. da schaner 2019 malperina cun ils assicuraders da malsauns davart l'autezza da l'indemnisaziun per las prestaziuns medicalas. Las regenzas chantunalas han ussa augmentà l'indemnisaziun vertenta dad 83 raps per punct da taxa sin da nov 86 raps.

Las prestaziuns da las medias e dals medis che pratitgeschan libramain vegnan indemnisadas sur la structura tariffara TARMED. Questa structura cuntegna var 4600 posiziuns tariffaras per prestaziuns medicalas ed attribuescha a mintga prestaziun in tschert dumber da puncts da taxa. Per fixar l'autezza da l'indemnisaziun, vegn il dumber da puncts da taxa multiplitgà cun la valur da puncts da taxa ch'è mintgamai valaivla. Fin la fin da l'onn 2018 importava la valur da puncts da taxa 83 raps. Areguard ina valur da puncts da taxa che avess valì a partir dal 1. da schaner 2019 n'èn las medias ed ils medis da la Svizra orientala betg vegnids perina cun ils assicuraders.

Las regenzas chantunalas han ussa decidì d'augmentar la valur da puncts da taxa dad 83 sin 86 raps. Questa decisiun è vegnida prendida suenter ina procedura pli lunga che ha durà plirs onns, quai pervia da la correspundenza detagliada tranter las partidas. La decisiun na sa basa betg sin las datas che las medias ed ils medis han registrà. En ina procedura sumeglianta era il Tribunal administrativ federal vegnì a la conclusiun, che questas datas na sajan betg adattadas per ina fixaziun. Alternativamain han las regenzas chantunalas deducì la tariffa sa basond sin la recumandaziun da la Surveglianza dals pretschs.

Nova valur da puncts da taxa valaivla a partir dal 2021
Sin basa da la situaziun da datas èsi inditgà per las regenzas chantunalas d'augmentar la valur da puncts da taxa. Las medias ed ils medis da la Svizra orientala mettevan a quint lur prestaziuns per ina da las valurs da puncts da taxa las pli bassas en Svizra. Per lur prestaziuns medicalas obtegnevan ellas ed els las entradas medicalas las pli bassas en Svizra. Ultra da quai n'è la valur da puncts da taxa betg pli vegnida midada dapi il 2014. Pervia da la durada da la procedura han las regenzas chantunalas decidì, che las medias ed ils medis na pon betg pretender indemnisaziuns posteriuras per ils onns 2019 e 2020. La valur da puncts da taxa pli auta vala per las prestaziuns a partir dal 2021.

L'augment da la valur da puncts da taxa vegn ad avair lieu a quint dals assicuraders da malsauns e pia ad avair consequenzas per las premias da l'assicuranza obligatorica per la tgira da malsauns. Pervia la valur da puncts da taxa pli auta vegni fatg quint cun in augment da las premias da 0,59 fin 0,75 pertschient, tut tenor il chantun. L'augment da la valur da puncts da taxa rinforza dentant tranter auter la medischina da chasa, perquai che tala diminuescha ils custs en il sistem general.

Las decisiuns n'èn anc betg en vigur. Sche las partidas n'èn betg perencletgas cun ellas, pon ellas far recurs tar il Tribunal administrativ federal.

Infurmaziuns:

President da la Regenza Peter Peyer, schef dal Departament da giustia, segirezza e sanadad, tel. +41 79 629 00 85 (cuntanschibel da las 09.30 fin las 10.30), e‑mail Peter.Peyer@djsg.gr.ch

Responsabladad: Regenza