La Regenza ha deliberà ina strategia chantunala davart il tema da dependenzas. En l'avegnir coordineschan ils posts da servetsch pertutgads pli fitg lur activitads, quai davent da la prevenziun fin a l'execuziun da chastis.
La Strategia chantunala Dependenzas ha la finamira da promover e da mantegnair la sanadad fisica e psichica da la populaziun en tut las fasas da la vita sco er da mitigiar las consequenzas d'ina dependenza per las persunas pertutgadas e per lur ambient social. Purschidas existentas vegnan optimadas, largias vegnan serradas, l'access a purschidas d'agid vegn facilità e la coordinaziun e cooperaziun tranter ils acturs relevants vegn rinforzada. Uschia po vegnir mess a disposiziun in provediment flexibel ch'è accordà cun l'entir chantun.
Meglra coordinaziun da las activitads
La Strategia chantunala Dependenzas s'orientescha als champs d'acziun da la Strategia naziunala Dependenzas cun las quatter pitgas: prevenziun, terapia, reducziun da donns e repressiun. Ella è vegnida sviluppada da l'Uffizi dal servetsch social e da l'Uffizi da sanadad per incumbensa da la Regenza, quai cun la cooperaziun dals acturs relevants e dals departaments pertutgads.
Il chantun Grischun ha ina vasta rait regiunala da purschidas da promoziun da la sanadad, da prevenziun e d'agid per persunas dependentas, ch'è adattada als basegns locals. Las cumpetenzas en il sectur da dependenzas èn repartidas sin numerus acturs. Per ina politica da dependenzas effectiva ed efficazia han la coordinaziun, la cooperaziun e la collavuraziun tranter las differentas parts involvidas ina impurtanza decisiva. La Strategia chantunala Dependenzas furma en quest reguard il rom d'acziun e d'orientaziun, fixescha cleras cumpetenzas entaifer l'administraziun chantunala e sustegna la garanzia da qualitad sco er l'ulteriur svilup da las purschidas d'agid per persunas dependentas en il Grischun.
Sensibilisar la populaziun per la tematica da dependenzas
Ina gronda part da la populaziun consumescha substanzas legalas, sco alcohol, tubac u medicaments, dovra l'internet u sa participescha a gieus da fortuna, senza periclitar sasezza ed auters. Intginas persunas s'exponan dentant a ristgas u perdan la controlla davart lur consum u davart lur cumportament. Ultra da quai vegnan consumadas substanzas illegalas (p.ex. cannabis, heroin u cocain). Ristgà è er il consum maschadà da substanzas, perquai che lur effect po sa midar. «Da tals cumportaments da ristga po resultar ina dependenza che chaschuna bleras suffrientschas per las persunas pertutgadas e per lur confamigliars», di il president da la Regenza Peter Peyer, schef dal Departament da giustia, segirezza e sanadad. La cumpetenza en chaussas da la sanadad duai vegnir rinforzada en tut las classas da vegliadetgna. Las mesiras da la promoziun da la sanadad e da la prevenziun da dependenzas han en mira las famiglias, la scola, il temp liber e las plazzas da lavur.
«Gist en fasas criticas da la vita èsi impurtant per las persunas pertutgadas, che l'ambient social percorschia in cumportament da dependenza e da ristga. Posts da consultaziun professiunals porschan sustegn e gidan a prevegnir», di il cusseglier guvernativ Marcus Caduff, schef dal Departament d'economia publica e fatgs socials. .
Tenor in studi elavurà per incumbensa da l'Uffizi federal da sanadad publica chaschunan las dependenzas en Svizra custs da 7,7 milliardas francs per onn per la societad. Mintga settavel mortori en Svizra ha in connex cun il fimar, il motiv zuppà da mintga sisavla diagnosa psichiatrica è in problem d'alcohol e tar la mesadad da tut ils delicts gioga l'alcohol ina rolla.
Las furmas da las dependenzas e lur caracteristicas sa midan cuntinuadamain. Medemamain sa mida la percepziun da la problematica en la societad. Ultra dals meds enivrants usitads, sco drogas illegalas, alcohol e tubac, vegnan ozendi er furmas da dependenza sco la dependenza da gieus per daners u l'utilisaziun excessiva da l'internet adina pli savens en il focus da l'interess public.
Dapli infurmaziuns:
Infurmaziuns:
- President da la Regenza Peter Peyer, schef dal Departament da giustia, segirezza e sanadad, e‑mail Peter.Peyer@djsg.gr.ch
- Cusseglier guvernativ Marcus Caduff, schef dal Departament d'economia publica e fatgs socials, e‑mail Marcus.Caduff@dvs.gr.ch
Ils dus cussegliers guvernativs stattan ultra da quai a disposiziun oz da las 11.00 fin las 11.30, en il rom da l'inscunter mensil da la Regenza, per dar scleriments.
Responsabladad: Regenza