La Regenza ha avert la consultaziun tar il sboz per il relasch d'ina Lescha davart la promoziun e la finanziaziun da mesiras per la protecziun dal clima e per l'adattaziun al clima en il Grischun (Lescha davart il fond per il clima). Questa lescha è la basa per la segunda etappa dal Plan d'acziun Green Deal.

Il project per la segunda etappa dal Plan d'acziun Green Deal (AGD) cuntegna las basas giuridicas per sustegnair finanzialmain ulteriuras mesiras da la protecziun dal clima e da l'adattaziun al clima. La finanziaziun duai vegnir garantida sur in fond grischun per il clima che sto vegnir stgaffì da nov. Cun il fond per il clima duain er vegnir finanziadas vinavant las intensivaziuns dals programs da promoziun per mesiras che fan effect entaifer curt temp, las qualas èn vegnidas fatgas durant l'emprima etappa dal AGD a partir da l'onn 2021.

Gia l'october 2021 ha il Cussegl grond approvà l'emprima etappa dal AGD e concedì in credit d'impegn da var 67 milliuns francs per las mesiras da promoziun da questa etappa. Cun ils daners dal credit d'impegn vegnan dapi lura intensivadas las mesiras per la protecziun dal clima che fan effect entaifer curt temp, sco per exempel la promoziun da las energias regenerablas e da l'effizienza energetica, la promoziun dal traffic public sco er mesiras da l'agricultura per la protecziun dal clima. A medem temp ha il Cussegl grond incumbensà la Regenza d'elavurar la segunda etappa.

Mesiras da promoziun facultativas
Il project sa concentrescha sin mesiras da promoziun facultativas e n'introducescha nagins cumonds u scumonds per cuntanscher la finamira da «netto nulla emissiuns da gas cun effect da serra» fin l'onn 2050. Questas mesiras da promoziun èn cuntegnidas en la nova Lescha davart il fond per il clima ed en ulteriuras leschas. Sco fin ussa duain per exempel dapli daners da promoziun ir a favur dal program d'edifizis, che vegn sustegnì da la Confederaziun e dals chantuns, ed a favur da la decarbonisaziun dal traffic public. Da nov èsi er pussaivel da sustegnair finanzialmain projects innovativs per la protecziun dal clima e projects per serrar ils ciclus da la materia, per las infrastructuras per chargiar vehichels electrics sin parcadis accessibels al public resp. tar chasas da pliras famiglias existentas, ubain per implants fotovoltaics vi d'edifizis, sche tals èn concepids ed optimads per dapli che per l'agen consum. Ina contribuziun survegnan mo ils projects ch'èn efficazis ed economics e che gidan a cuntanscher en moda duraivla las finamiras da la lescha.

Funcziun d'exempel dal chantun e da las vischnancas
Il chantun Grischun va ordavant cun bun exempel e s'oblighescha da cuntanscher la finamira netto nulla cun l'administraziun chantunala gia fin l'onn 2040. Er las vischnancas vegnan envidadas da cuntanscher questa finamira per lur administraziuns centralas, tant enavant che lur resursas pussibiliteschan quai.

Cronologia dal Plan d'acziun Green Deal

• Zercladur 2019
  Acceptaziun da l'incumbensa Wilhelm concernent in Green Deal per il Grischun: nizzegiar la protecziun dal clima sco schanza tras il Cussegl grond ed incumbensa a la Regenza da preschentar mesiras concretas ed efficazias per la protecziun dal clima e per l'adattaziun al clima incl. plan da finanziaziun.
• October 2021
  Debatta dal Cussegl grond davart la missiva «Green Deal per il Grischun – rapport intermediar davart la planisaziun da mesiras cun concept da finanziaziun e cun credit d'impegn (67 milliuns francs) per l'etappa I» e decisiuns directivas per l'elavuraziun da la segunda etappa dal AGD.
• Dapi il december 2021
  Pajament da daners da promoziun en il rom da l'emprima etappa dal AGD per ils secturs da l'amplificaziun d'energias regenerablas, da l'augment da l'effizienza e dal remplazzament da stgaudaments (fossils, directelectrics) en ils edifizis sco er pajament da contribuziuns d'investiziun per il traffic public e per il transport da rauba. Cuntinuaziun da la fasa da pilot dal project «Agricultura neutrala al clima», ch'è vegnida lantschada il cumenzament da l'onn 2021 cun pli che 50 manaschis.
• Schaner 2024
  Avertura da la consultaziun tar la Lescha davart il fond per il clima en il rom da la segunda etappa dal AGD.

Dapli infurmaziuns davart il «Plan d'acziun Green Deal per il Grischun» resp. davart la via a la finamira «netto nulla emissiuns da gas cun effect da serra 2050» chattais Vus sin la pagina d'internet dal chantun www.klimawandel.gr.ch.

Ils documents da consultaziun èn ussa disponibels
La consultaziun dura dals 9 da schaner fin ils 10 d'avrigl 2024. Las dumondas dal questiunari da consultaziun pon ins respunder online sut https://gr.e-mitwirkung.ch/rm/klimafondsgesetz. Sche Vus vulais inoltrar ina posiziun cumplementara, As supplitgain nus da trametter quella per e-mail a greendeal@anu.gr.ch. Ils documents da consultaziun chattais Vus sin la pagina d'internet dal chantun Grischun.

Infurmaziuns:

President da la Regenza dr. Jon Domenic Parolini, tel. +41 81 257 27 02, e‑mail Jondomenic.Parolini@ekud.gr.ch

Responsabladad: Regenza