La Regenza grischuna dat en consultaziun il sboz per ina revisiun totala da la Lescha chantunala davart la protecziun da datas. Tras la revisiun totala vegn il dretg chantunal davart la protecziun da datas adattà a la realitad tecnologica actuala sco er als svilups dal dretg europeic.
La Lescha chantunala davart la protecziun da datas (LCPD; DG 171.100) era vegnida messa en vigur il 1. da matg 2002. En quests passa 20 onns è ella vegnida adattada mo en paucs puncts. En la medema perioda hai dentant dà gronds progress tecnologics. Ils pretschs sbassants per la capacitad da memorisar datas sco er la disponibladad creschenta d'attatgs d'internet adina pli svelts permettan da retschaiver, da spedir sco er d'arcunar en ina dimensiun pli vasta datas sur l'internet. Ultra da quai daventa l'elavuraziun e la communicaziun transcunfinala da datas adina pli impurtanta. Per quests motivs èn vegnids revedids e mess en vigur ils ultims onns differents relaschs davart la protecziun da datas sin plaun europeic. Quests relaschs èn liants er per la Confederaziun e per ils chantuns. Els ston vegnir realisads en il dretg chantunal, per che las disposiziuns chantunalas davart la protecziun da datas adempleschian er en l'avegnir il standard europeic. La LCPD sto perquai vegnir revedida totalmain.
Rinforzament dals dretgs da las persunas pertutgadas e da la surveglianza da la protecziun da datas
La revisiun duai sa limitar a quels puncts ch'èn absolutamain necessaris per realisar las prescripziuns dal dretg internaziunal. Ils organs publics ch'èn suttamess a la lescha (autoritads chantunalas e communalas) ston observar in pèr novs instruments e duairs. Quels servan en emprima lingia a rinforzar ils dretgs da las persunas ch'èn pertutgadas d'ina elavuraziun da datas. Plinavant pretenda il dretg surordinà in rinforzament da la surveglianza da la protecziun da datas, che vegn ademplida en il chantun Grischun tras l'incumbensada u l'incumbensà per la protecziun da datas. D'ina vart sto vegnir rinforzada l'independenza da quest post. Da l'autra vart survegn el – tras la revisiun da la lescha – novas incumbensas e cumpetenzas.
Ils documents da consultaziun èn ussa disponibels
La consultaziun dura dals 25 da schaner 2024 fin ils 24 d'avrigl 2024. Ils documents appartegnents stattan a disposiziun sin la pagina d'internet dal chantun Grischun. Ultra da quai pon els vegnir empustads per telefon (tel. +41 81 257 25 16) tar il Departament da giustia, segirezza e sanadad.
Infurmaziuns:
Cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 89 71 (cuntanschibel da las 09.00 fin las 11.00), e‑mail Peter.Peyer@djsg.gr.ch
Responsabladad: Regenza