Las apotecas en il chantun porschan vinavant vaccinaziuns cunter COVID 19. L'Uffizi da sanadad ha relaschà ina disposiziun correspundenta. Ils custs da la vaccinaziun cunter COVID-19 tenor la recumandaziun da vaccinar surpiglia il chantun previsiblamain fin la fin da zercladur 2024. Fin la fin dal 2023 ha la Confederaziun purtà ils custs. Ils custs per las vaccinaziuns cunter COVID-19 en las praticas da medi surpiglia vinavant la Confederaziun.

Las apotecas che fan las vaccinaziuns èn s'etablidas fermamain durant la pandemia dal coronavirus, quai en il sectur da sanadad dal Grischun ed en la percepziun da la populaziun. La stima per il servetsch da vaccinar da las apotecas localas è gronda. L'atun 2023 han 14 apotecas fatg circa 1500 vaccinaziuns cunter COVID-19.

L'atun/l'enviern vegn la vaccinaziun cunter COVID-19 recumandada a tut las persunas spezialmain periclitadas. Tar quellas tutgan persunas a partir da 65 onns, persunas a partir da 16 onns cun ina malsogna cronica e persunas a partir da 16 onns cun trisomia 21. Las persunas spezialmain periclitadas han ina ristga pli gronda da subir in decurs grev da la malsogna. La vaccinaziun meglierescha per plirs mais la protecziun cunter grevs decurs da la malsogna e cunter las cumplicaziuns respectivas. La vaccinaziun cunter COVID-19 pon ins obtegnair en apotecas che fan vaccinaziuns ed en diversas praticas da medis da chasa. Per quellas persunas che la vaccinaziun vegn recumandada è tala gratuita.

Infurmaziuns:

Marina Jamnicki, media chantunala, Uffizi da sanadad, tel. +41 81 257 26 46, e‑mail Marina.Jamnicki@san.gr.ch

Responsabladad: Uffizi da sanadad