Per meglierar il provediment da la sanadad en las regiuns promova il chantun Grischun l'installaziun da posts da cussegliaziun regiunals. Quels servan sco puncts da consultaziun centrals per dumondas dal sectur da sanadad, e quai tant per la populaziun sco er per las acturas ed ils acturs dals fatgs da sanadad. La finamira è quella da distgargiar las acturas ed ils acturs dals fatgs da sanadad e da spargnar custs e resursas a lunga vista grazia ad ina cussegliaziun u ad ina triascha adequata – in uschenumnà management da cas.

Suenter ina greva malsogna e/u suenter avair bandunà l'ospital èn las persunas pertutgadas confruntadas cun numerusas dumondas, che tanschan da la sanadad fin a temas socials e finanzials. In vast management da cas gida ad identifitgar ils basegns e maina las persunas pertutgadas als dretgs posts. Il chantun ha deliberà in concept general che serva a las regiuns da provediment da la sanadad sco basa per installar posts da cussegliaziun regiunals e per introducir in vast management da cas.

«In management da cas che funcziuna bain rinforza il provediment da la sanadad en las regiuns ed il provediment optimal da las persunas pertutgadas», di il cusseglier guvernativ Peter Peyer, schef dal Departament da giustia, segirezza e sanadad. In'analisa dal management da cas en il chantun Glaruna, ch'è vegnida fatga da la firma KPMG, ha mussà ch'in management da cas efficazi po gidar a spargnar custs. Bain èsi uschia, che la regiun da provediment da la sanadad sto finanziar l'installaziun dal management da cas. Ils respargns che vegnan cuntanschids a lunga vista predomineschan però ils custs d'installaziun.

Prevenziun e diagnosa tempriva da malsognas
L'introducziun dal management da cas correspunda al princip «ambulant avant staziunar». Tras posts da cussegliaziun neutrals ed independents survegn la populaziun gratuitamain infurmaziuns e cussegliaziun davart purschidas da sanadad sco er en dumondas dals fatgs socials e da las finanzas. En situaziuns da vita cumplexas, p.ex. en cas da grevas malsognas u da difficultads finanzialas, fan ils posts da cussegliaziun in management da cas ensemen cun las persunas pertutgadas. Il post da cussegliaziun coordinescha las purschidas adattadas en il sectur da sanadad e maina las persunas pertutgadas als posts cumpetents.

Ils posts da cussegliaziun regiunals prestan er ina contribuziun a favur da la prevenziun e da la diagnosa tempriva da malsognas tar uffants, tar giuvenils e tar persunas creschidas. Cun il post da cussegliaziun Vegliadetgna e sanadad exista p.ex. en l'Engiadin'Ota gia in tal post da cussegliaziun regiunal.

Ils ospitals fan gia oz in management da cas intern, che stat a disposiziun principalmain a las pazientas ed als pazients staziunars. Ils posts da cussegliaziun regiunals cuntinueschan cun questa purschida: suenter la sortida da l'ospital rendan els accessiblas infurmaziuns davart purschidas da sanadad e coordineschan las prestaziuns. La purschida sa drizza er a persunas ordaifer ils ospitals che na vegnan betg tractadas en in ospital, sco er ad acturas ed ad acturs dals fatgs socials e dal sectur da sanadad.

Distgargia dals confamigliars e promoziun da la reconvalescenza
Sco prestaziun interdisciplinara dals posts da cussegliaziun regiunals ha il management da cas tut en tut l'intent da distgargiar ils confamigliars, da garantir il provediment ambulant, da retardar u d'impedir entradas en chasas da tgira, da promover la reconvalescenza e l'integraziun sociala sco er da stabilisar il sistem famigliar, per uschia reducir ils custs da sanadad.

In punct central per manar ils posts da cussegliaziun regiunals e per realisar il management da cas è la cooperaziun cun las acturas ed ils acturs locals. L'installaziun e la gestiun dal management da cas è chaussa da las regiuns da provediment da la sanadad.

Infurmaziuns:

• Cusseglier guvernativ Peter Peyer, schef dal Departament da giustia, segirezza e sanadad, e‑mail Peter.Peyer@djsg.gr.ch
• Rudolf Leuthold, manader da l'Uffizi da sanadad dal Grischun, tel. +41 81 257 26 41 (cuntanschibel da las 10.30 fin las 11.30), e‑mail Rudolf.Leuthold@san.gr.ch