In nov edifizi persistent da lain duai remplazzar l'edifizi da scolaziun e d'alloschi al Meiersboda ch'è ussa magari vegl. Per la protecziun civila e sias organisaziuns partenarias vegnan uschia stgaffidas infrastructuras che pon vegnir utilisadas en moda flexibla per ina instrucziun effizienta. La Regenza ha deliberà la missiva da construcziun correspundenta per mauns dal Cussegl grond. Ils custs per l'edifizi d'instrucziun importan 18,95 milliuns francs.

Il center d'instrucziun da la protecziun civila al Meiersboda sa chatta a l'ur da la citad da Cuira, sin territori communal da Churwalden. L'edifizi da scolaziun e d'alloschi ch'è var 50 onns vegl, è en in fitg nausch stadi architectonic. L'entira tecnica da chasa è antiquada e la segirezza tecnica è manglusa. Tenor divers scleriments e tenor calculaziuns da persistenza fundadas èsi sa mussà en il cas concret, ch'in edifizi cumpensatoric nov ha clers avantatgs cumpareglià cun ina renovaziun cumplessiva dal bain immobigliar. Il settember 2022 ha la Regenza perquai concludì d'organisar ina concurrenza publica da projects per la construcziun d'in nov center d'instrucziun. Gudagnà la procedura da concurrenza ha il project proponì «ZicZAC» (cf. communicaziun a las medias dals 8 da zercladur 2023) d'in team da planisaders per gronda part indigen.

In center d'instrucziun modern per garantir la prontezza a l'acziun
Gia oz èn las sfidas da dar dumogn ad eveniments multipels e cumplexs fitg grondas per la protecziun civila e per ulteriuras organisaziuns partenarias en il sistem da cooperaziun da la protecziun da la populaziun (polizia, pumpiers, sectur da sanadad, manaschis tecnics). Eveniments relevants per la protecziun da la populaziun – pervia da las cundiziuns climaticas ch'èn sa midadas, ma er pervia da midadas tecnicas e socialas – dastgassan en l'avegnir capitar pli savens ed er en ina pli gronda intensitad. Per che la prontezza a l'acziun e la capacitad d'intervenziun possian vegnir garantidas, dovri per l'instrucziun e per l'engaschament en cas d'in eveniment ina infrastructura moderna che correspunda als basegns.

Cun l'edifizi cumpensatoric nov vegnan stgaffidas las premissas per in manaschi d'instrucziun e d'administraziun effizient. En cas d'urgenza e da catastrofa po il center d'instrucziun Meiersboda plinavant er servir al Stab directiv chantunal sco lieu d'acziun e da direcziun. En situaziuns spezialas ed extraordinarias porscha la nova infrastructura uschia – tant a la protecziun civila sco er a las organisaziuns partenarias e betg sco ultim al Stab directiv chantunal – cundiziuns optimalas per ademplir lur incarica da prestaziun. En cas d'in eveniment sto la Protecziun civila dal Grischun cun ses actualmain 2400 appartegnents activs pudair dumagnar sias incumbensas sur in pli lung temp, durant il qual il center d'instrucziun vegn duvrà er sco basa logistica e sco centrala da commando.

Infrastructura orientada al futur
Il project dal center nov prevesa in edifizi cumpact da trais plauns che s'integrescha – sco simpel edifizi solitari construì en lain – armonicamain en la cuntrada natirala. Cunzunt la structura fundamentala clera da l'edifizi ed il diever da material da construcziun natiral persvadan. L'intern da l'edifizi ha ina structura organisatorica che s'orientescha cumplettamain ad in atrium central ch'è vers ensi spustà en la diagonala. Blera glisch dal di ed ina gronda survesaivladad èn ulteriurs elements che persvadan. Il concept general sa basa sin l'applicaziun da princips cumprovads da la construcziun persistenta: volumen cumpact, structura purtanta d'auta qualitad cun princips da construcziun nuncumplitgads ed in simpel concept da tecnica da chasa «low-tech». Il nov edifizi vegn construì e certifitgà en il standard Minergie-P-Eco®. Sin il tetg èn ils elements da fotovoltaica concepids en moda maximala ed han ina prestaziun da 100 kilowatts peak. Ils custs d'investiziun per il nov edifizi planisà importan tut en tut 18,95 milliuns francs.

I dovra il consentiment dal Cussegl grond e da las votantas e dals votants
Il Cussegl grond vegn a tractar la missiva da construcziun en la sessiun d'avrigl 2024. Sch'il parlament dat ses consentiment, vegn il project da construcziun ed il credit d'impegn suttamess il settember 2024 a las votantas ed als votants dal Grischun per l'approvaziun. La planisaziun d'execuziun duai previsiblamain cumenzar l'atun 2024 e las lavurs da construcziun la primavaira 2025. Il nov center d'instrucziun pudess uschia vegnir mess en funcziun la stad 2027.

Visualisaziun:

© atelier tsu / bersa / Tao Architects Office, Cuira

Agiunta:

Missiva

Infurmaziuns:

Cussegliera guvernativa dr. Carmelia Maissen, Vorsteherin Departement für Infrastruktur, Energie und Mobilität, tel. +41 81 257 36 01 (cuntanschibla da las 09.00 fin las 10.00), e‑mail Carmelia.Maissen@diem.gr.ch

Responsabladad: Regenza