La Regenza ha deliberà la missiva tar la revisiun parziala da la Lescha davart las scolas autas e la perscrutaziun. Ultra da quai ha ella deliberà contribuziuns chantunalas per la fundaziun «Greater Zurich Area Standortmarketing» e per revitalisar il Rain Posteriur tar Nufenen/Medels.
Deliberà la missiva tar la revisiun parziala da la Lescha davart las scolas autas e la perscrutaziun
Cun la revisiun parziala da la Lescha davart las scolas autas e la perscrutaziun stgaffescha la Regenza la basa per tegnair quint da las cundiziuns generalas midadas dal sectur da las scolas autas e per promover il svilup da las scolas autas e da la perscrutaziun en il chantun Grischun. La revisiun dat a las instituziuns dal sectur da las scolas autas e da perscrutaziun l'agilitad necessaria per sa far valair en la concurrenza naziunala ed internaziunala. La Regenza grischuna ha deliberà la missiva correspundenta. La revisiun parziala promova uschia l'attractivitad dal chantun sco lieu da studi e da perscrutaziun. Il Cussegl grond vegn a tractar questa fatschenta en la sessiun da zercladur 2024.
Agiunta: Missiva
Cun la revisiun parziala da la Lescha davart las scolas autas e la perscrutaziun stgaffescha la Regenza la basa per tegnair quint da las cundiziuns generalas midadas dal sectur da las scolas autas e per promover il svilup da las scolas autas e da la perscrutaziun en il chantun Grischun.
Elecziuns da la Regenza
La Regenza elegia Jan Koch sco nov president e Vincenzo Cangemi sco nov commember da la cumissiun administrativa da l'Assicuranza d'edifizis dal Grischun sco er Fabian Disch sco nov commember dal cussegl d'administraziun dals Servetschs psichiatrics dal Grischun. Tuts trais elegids adempleschan tenor l'avis da la Regenza fitg bain ils profils pretendids ed han correspundentamain pudì persvader en la procedura da selecziun cun lur persunalitad e cun lur via professiunala.
La Regenza elegia Jan Koch sco nov president e Vincenzo Cangemi sco nov commember da la cumissiun administrativa da l'Assicuranza d'edifizis dal Grischun sco er Fabian Disch sco nov commember dal cussegl d'administraziun dals Servetschs psichiatrics dal Grischun.
Contribuziun chantunala per la fundaziun «Greater Zurich Area Standortmarketing»
La Regenza ha approvà per ils onns 2024 fin 2027 ina contribuziun chantunala annuala da maximalmain 125 000 francs a favur da la fundaziun «Greater Zurich Area Standortmarketing». La fundaziun è vegnida fundada l'onn 1998 dal chantun Turitg. Sia finamira è quella da mantegnair e da rinforzar cuminaivlamain la posiziun dominanta dal spazi economic Greater Zurich Area en la concurrenza europeica e globala.
Dapi l'onn 2000 è il chantun Grischun conpurtader da la fundaziun «Greater Zurich Area Standortmarketing». Ulteriurs purtaders èn ils chantuns Turitg, Schaffusa, Soloturn, Sviz, Glaruna, Zug, Uri e Tessin sco er la citad da Turitg e la regiun Winterthur.
Activitads autonomas da la promoziun economica internaziunala, cunzunt en martgads sco l'America dal Nord u l'Asia, pretendan fitg bleras resursas. La commembranza è perquai ina pussaivladad empermettenta per il chantun Grischun d'augmentar il renum da l'atgna plazza economica en il martgà internaziunal.
La Regenza ha approvà per ils onns 2024 fin 2027 ina contribuziun chantunala annuala da maximalmain 125 000 francs a favur da la fundaziun «Greater Zurich Area Standortmarketing». La fundaziun è vegnida fundada l'onn 1998 dal chantun Turitg. Sia finamira è quella da mantegnair e da rinforzar cuminaivlamain la posiziun dominanta dal spazi economic Greater Zurich Area en la concurrenza europeica e globala.
Glisch verda per revitalisar il Rain Posteriur tar Nufenen/Medels
La Regenza approvescha in project per revitalisar il Rain Posteriur en la vischnanca da Valragn, conceda las permissiuns necessarias per quest intent e deliberescha ina contribuziun chantunala en l'autezza da 138 000 francs.
Il perimeter dal project per revitalisar il Rain Posteriur en il territori Äbi cumpiglia cunzunt il Göriwald che cunfinescha cun la riva dretga dal Rain Posteriur al vest da Medels. Il Göriwald, determinà sco zona umida d'impurtanza regiunala, è oz separà cumplettamain dal Rain Posteriur pervia dal letg dal flum approfundà. Ils spazis vitals da la riva, las spezias d'animals e da plantas dependentas d'aua sco er il maletg da la cuntrada, han perdì il caracter d'ina zona umida. Il traject da revitalisaziun cumenza immediatamain suenter la sbuccada dal Függschtobelbach e tanscha fin var 150 meters sur la punt dal Rain posteriur tar Medels. Il traject ha uschia ina lunghezza da circa 1000 meters. Il project da revitalisaziun ha sco finamira d'augmentar considerablamain la valur ecologica e da la cuntrada dal Rain Posteriur e da ses secturs da riva en il perimeter dal project, sco er da meglierar la protecziun cunter aua gronda per la via naziunala. Cun restabilir la dinamica d'ina zona umida e cun promover ils spazis da viver caracteristics duai vegnir cuntanschì in stadi natiral e puspè vegnir pussibilità in augment da la biodiversitad en il territori Äbi.
Il cumenzament da las lavurs per la revitalisaziun è previs per la primavaira 2024. La terminaziun pussaivla da las lavurs da construcziun è la fin da l'onn 2026. Ils custs totals da quest project vegnan budgetads cun var 7,94 milliuns francs.
Maletg 1: Survista dal territori dal project en il stadi actual
Maletg 2: Visualisaziun dal territori dal project suenter avair realisà las mesiras da revitalisaziun
© P. Rey, Hydra SA
La Regenza approvescha in project per revitalisar il Rain Posteriur en la vischnanca da Valragn, conceda las permissiuns necessarias per quest intent e deliberescha ina contribuziun chantunala en l'autezza da 138 000 francs.
Contribuziun per renovar la via champestra Runcalier a Churwalden
La Regenza ha garantì a la vischnanca da Churwalden ina contribuziun chantunala da 303 000 francs als custs per renovar la via champestra Runcalier (part per diever agricul).
Questa contribuziun chantunala è vegnida deliberada sin basa d'ina contribuziun federala da maximalmain 353 500 francs. Ils custs imputabels per renovar questa via champestra agricula importan maximalmain var 1 milliun francs.
La Regenza ha garantì a la vischnanca da Churwalden ina contribuziun chantunala da 303 000 francs als custs per renovar la via champestra Runcalier (part per diever agricul).
