Il chastagner selvadi da 175 onns en il curtin da la villa Brunnengarten a Cuira ha da far cun la vegliadetgna. Dus bulieus agressivs a la basa dal mutagl indebleschan la stabilitad dal bostg. Per quest motiv vegn la tschima tagliada enavos ils proxims dis. Uschia s'augmenta la schanza da mantegnair il bostg anc pli ditg en vita.
Il chastagner selvadi imposant da la villa Brunnengarten a l'Obere Plessurstrasse a Cuira è vegnì plantà, cura ch'il curtin è vegnì endrizzà enturn l'onn 1850. Uschia ha l'aesculus hippocastanum var 175 onns. Regularmain controlleschan e tgiran persunas spezialisadas il bostg ed al taglian per al distgargiar. Parts da la curuna che pudessan rumper vegnan segiradas cun sugas. Tar la controlla l'onn passà è vegnida a la glisch a la basa dal mutagl vers sid in sectur pli grond pirì ch'è infectà da dus bulieus agressivs. I sa tracta dals bulieus kretzschmaria deusta e hallimasch (armillaria mellea). Omadus bulieus pon tant indeblir la stabilitad dal bostg ed er far ch'el pirescha.
La mesiraziun ha ussa mussà che la stabilitad n'è betg pli garantida en quest lieu. Per quest motiv han las persunas spezialisadas da l'Uffizi da construcziun auta dal Grischun e da l'Uffizi per la natira e l'ambient dal Grischun concludì che la tschima dal chastagner selvadi stoppia vegnir tagliada fermamain. Mo uschia èsi da responsar ch'il bostg vegnia mantegnì vinavant. Tras la reducziun duain tant la chargia chaschunada dal vent sco er la grevezza sin il pe dal bist vegnir indeblidas. Malgrà tut las mesiras sto dentant vegnir quintà che la stabilitad sa reduceschia vinavant u ch'il chastagner selvadi pireschia cumplainamain en intgins onns. Persunas spezialisadas vegnan er a controllar vinavant regularmain il bostg.
Serrada da la Punt taliana
Mesemna, ils 3 d'avrigl 2024, vegn a partir da las 7.00 cumenzà cun las lavurs da tagl al chastagner selvadi. Sche quai na duess betg esser pussaivel per motivs da l'aura, vegnan las lavurs spustadas sin glindesdi, ils 8 d'avrigl 2024. Pervia da las lavurs vegn la Polizia da la citad da Cuira a serrar la Punt taliana per il traffic da peduns e da velos per previsiblamain dus fin trais dis. In sviament è signalisà correspundentamain. La lingia d'Arosa da la Viafier retica, l'entir manaschi da bus (Bus da Cuira ed AutoDaPosta) sco er il traffic individual sin la Grabenstrasse circuleschan en moda normala e n'èn betg pertutgads da la serrada.
Fotografia agiuntada:
Infurmaziuns:
Andreas Kohne, architect chantunal, Uffizi da construcziun auta dal Grischun, tel. +41 81 257 36 31 (cuntanschibel da las 11.00 fin las 12.00), e‑mail Andreas.Kohne@hba.gr.ch
Responsabladad: Uffizi da construcziun auta