La midada tecnologica procura per in svilup cuntinuant da las tecnologias da basa che vegnan applitgadas da l'Administraziun da taglia. Tut las applicaziuns da taxaziun che han ina tscherta vegliadetgna, ston perquai vegnir renovadas e preparadas per il futur. Las persunas obligadas da pajar taglia ston perquai spetgar excepziunalmain in pau pli ditg, fin ch'ellas survegnan lur disposiziun da taxaziun definitiva.
Cun introducir l'inoltraziun da la decleraziun da taglia senza midar medium ha l'Administraziun da taglia stgaffì ils ultims onns ina plivalur considerabla per ils pajataglias. Sco consequenza da novs svilups tecnologics ston las applicaziuns da basa entaifer l'administraziun ussa vegnir remplazzadas per pudair garantir vinavant in manaschi irreproschabel. L'onn 2023 èn las lavurs sa focusadas sin il nov register da taglia. Il cumenzament dal 2024 han ins mess en funcziun quel. Ils onns 2024 e 2025 vegn realisada l'introducziun successiva da la nova applicaziun da taxaziun per persunas natiralas. Il remplazzament d'ulteriuras applicaziuns per las persunas giuridicas e per taglias spezialas suonda suenter en etappas.
Transfurmaziun che dovra bleras resursas
Questa restructuraziun digitala pretenda l'integraziun da bleras resursas persunalas entaifer l'Administraziun chantunala da taglia ed ils uffizis communals da taglia, respectivamain entaifer las allianzas da taglia. Durant la restructuraziun na stat il manaschi ordinari betg airi. La durada tranter l'inoltraziun da la decleraziun da taglia e la spediziun da la disposiziun da taxaziun po dentant esser pli lunga che usità. Tenor las circumstanzas sa stentan l'Administraziun da taglia ed ils uffizis communals da taglia, respectivamain las allianzas da taglia d'elavurar las decleraziuns da taglia inoltradas entaifer uschè curt temp sco pussaivel.
Infurmaziuns:
Angelo Roberto, manader da l'Administraziun chantunala da taglia, tel. +41 81 257 34 44 (cuntanschibel da las 8.30 fin las 11.30), e‑mail Angelo.Roberto@stv.gr.ch
Responsabladad: Administraziun da taglia