Ils 12 da mars 2024 ha la Regenza deliberà la missiva tar il credit supplementar al credit d'impegn per l'etappa I dal Plan d'acziun «Green Deal per il Grischun» (AGD). En questa missiva vegn dumandà per l'onn 2025 in credit supplementar da 20 milliuns francs al credit d'impegn da 67 milliuns francs ch'era gia vegnì approvà per ils onns 2021 fin 2024. I sa tracta d'ina soluziun transitorica per l'onn 2025, che duai vegnir remplazzada previsiblamain il 1. da schaner 2026 tras la Lescha davart il fond per il clima (LCClima).

Damai ch'il credit d'impegn da 67 milliuns francs approvà per ils onns 2021 fin 2024 sco er las obligaziuns da contribuziun pendentas vegnan ad esser consumadas dal tuttafatg previsiblamain fin la fin da l'onn 2024, dovri ina soluziun transitorica en furma d'in credit supplementar per evitar ina largia da finanziaziun l'onn 2025. Cun il credit supplementar da 20 milliuns francs duain vegnir mess a disposiziun meds finanzials supplementars per il program da promoziun chantunal en connex cun sanaziuns energeticas d'edifizis (var 18,7 milliuns francs) sco er per projects per promover il traffic public ed il transport da rauba cun la viafier (var 1,3 milliuns francs).

L'analisa da las promoziuns pli intensivas cun il credit d'impegn approvà per l'etappa I dal AGD ha mussà, ch'i dovra questas promoziuns per cuntanscher las finamiras e ch'ils programs da promoziun han l'effect per ademplir il plan da reducziun dal CO₂ definì.

Dublegià il dumber da dumondas inoltradas
En la missiva al Cussegl grond tira la Regenza in emprim facit positiv or da las promoziuns ch'èn vegnidas realisadas fin ussa cun il program d'edifizis chantunal: Cun l'augment da las contribuziuns da promoziun sin basa dal AGD (uschenumnà bonus da Green Deal) è il dumber da dumondas da promoziun praticamain sa dublegià dapi l'onn 2022. Ils meds da promoziun da la Confederaziun e dal chantun èn creschids da tut en tut 32 milliuns francs (2020 e 2021) a var 93 milliuns francs (2022 e 2023).

Per onn èn vegnidas effectuadas tras quai investiziuns da var 500 milliuns francs per sanaziuns d'edifizis. Dapi l'onn 2022 è plinavant la reducziun da las emissiuns da CO₂, ch'è vegnida cuntanschida grazia a sanaziuns d'edifizis, s'augmentada per 44 pertschient da 57 000 tonnas CO₂ per onn ad 83 000 tonnas CO₂ per onn.

Il Cussegl grond vegn a tractar la missiva previsiblamain en la sessiun da zercladur 2024.

Agiunta:

Missiva

Infurmaziuns:

• Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, tel. +41 81 257 36 05 (cuntanschibla da las 10.00 fin las 11.00), e‑mail Carmelia.Maissen@diem.gr.ch
• Thomas Schmid, manader da l'Uffizi d'energia e da traffic, tel. +41 81 257 36 21 (cuntanschibel da las 09.30 fin las 14.00), e‑mail Thomas.Schmid@aev.gr.ch

Responsabladad: Regenza