Da la buna pratica al nov standard. Butias sco mazlarias, pasternarias, butias da bains purils, commerzis en detagl, drogarias, fatschentas da bavrondas e latgarias u chascharias pon spargnar daners e prestar ina contribuziun impurtanta per minimar il food waste e pia per reducir las grevezzas per l'ambient, sch'ellas vendan products pli ditg che quai la data da conservabladad inditgescha. Cun quest project porscha l'organisaziun da non profit foodwaste.ch sustegn als commerzis en detagl pitschens e mesauns sco er a las butias dals bains purils per realisar la vendita legalmain permessa da products cun ina conservabladad pli lunga.
Il chantun sustegna il project e surpiglia ina part da 200 francs dals custs per ils starter-sets, per che las butias possian vender products cun ina conservabladad pli lunga. En tut la Svizra pudessan uschia vegnir evitadas 20 000 fin 30 000 tonnas food waste. 400 starter-sets gratuits en furma d'ina chascha d'instruments digitala cun etichettas, glistas da controlla, ina instrucziun ed infurmaziuns per las consumentas ed ils consuments stattan a disposiziun e gidan uschia, che er pitschnas butias pon realisar questa mesira.
Dapli fidanza – dapli stima
La data da conservabladad minimala vegn inditgada sin products che na van strusch a mal. Cuntrari a la data da consumaziun na cuntegna la data da conservabladad minimala naginas infurmaziuns davart la segirezza da victualias. Tut tenor la gruppa da products pon ins consumar quests products senza resalvas er 6 fin 360 dis suenter la scadenza da la data da conservabladad minimala – uschè ditg ch'il product guarda or bain, savura bain e gusta bain. Per las consumentas ed ils consuments stoi puspè daventar natiral da sa fidar sin lur senns. Cun vender products anc suenter la data da conservabladad surpiglian las butias ina rolla impurtanta per gidar a sviluppar la confidenza da consumar talas victualias. Quai vala er per rauba che va svelt a mal, ma che dastga vegnir vendida fin 90 dis pli ditg, sch'ella vegn schelentada fin a la data da consumaziun.
Commerzi en detagl cun funcziun d'exempel
La funcziun d'exempel dal commerzi en detagl ha plinavant in effect positiv sin il food waste en las chasadas. Sche las consumentas ed ils consuments vesan en la butia, che per exempel la farina dastga vegnir vendida e consumada fin 360 dis suenter la scadenza da la data da conservabladad minimala, vegnan ellas ed els er a duvrar la farina scadida a chasa pli ditg. Circa 20 pertschient dal food waste en las chasadas svizras resultan, perquai che la data da conservabladad vegn interpretada en moda faussa. Quai èn 150 000 tonnas ruments alimentars per onn.
Dapli infurmaziuns:
Infurmaziuns:
- Stefan Covanti, partiziun Protecziun tecnica e manaschiala da l'ambient, Gestiun da ruments, Uffizi per la natira e l'ambient, tel. +41 81 257 29 73 (cuntanschibel da las 09.00 fin las 17.00), e‑mail Stefan.Covanti@anu.gr.ch
- Erika Bauert, manadra dal project «MHD+ im Detailhandel», foodwaste.ch, e‑mail eb@foodwaste.ch
Responsabladad: Uffizi per la natira e l'ambient