La Regenza grischuna ha nominà Bettina Simioni sco nova secretaria da finanzas en il Departament da finanzas e vischnancas (DFV).

La Regenza grischuna ha elegì Bettina Simioni, M.A. HSG, che ha 43 onns, sco nova secretaria da finanzas dal DFV. Bettina Simioni ha rimnà durant bundant 20 onns experientschas en il sectur da finanzas, tranter auter sco economa tar la Banca naziunala svizra (BNS). Dapi l'onn 2016 lavura ella en differentas posiziuns en la Direcziun da finanzas dal chantun Turitg, l'ultim sco manadra da la partiziun Gestiun da las finanzas. Bettina Simioni ha in diplom da master of arts en economia publica da l'Universitad da Son Gagl, in diplom da master of arts en relaziuns internaziunalas da l'Universitad da Genevra sco er in CAS en public management e direcziun da la Scola auta turitgaisa per scienzas applitgadas (ZHAW). La dunna ch'è naschida a Winterthur abita actualmain cun ses um ad Ennetbaden. Ella sa legra sin la nova fasa da sia vita en il chantun Grischun.

Bettina Simioni succeda Urs Brasser che va en sia pensiun meritada l'avrigl 2025, suenter ch'el è stà passa 36 onns en questa funcziun.

Il DFV ademplescha differentas incumbensas sco l'administraziun da taglia, la surveglianza da las vischnancas u la valitaziun d'immobiglias. Ultra da quai surpiglia el incumbensas interdisciplinaras per l'entira administraziun. Latiers tutgan en spezial la budgetaziun e la planisaziun da las finanzas, servetschs d'informatica sco er il management dal persunal.

Fotografia agiuntada:

Infurmaziuns:

Cusseglier guvernativ Martin Bühler, schef dal Departament da finanzas e vischnancas, tel. +41 81 257 32 01 (cuntanschibel da las 10.30 fin las 12.00), e‑mail Martin.Buehler@dfg.gr.ch