A partir dad oz pon ins consultar il sboz da l'urari per il traffic public per l'onn 2025 en l'internet. Fin ils 9 da zercladur 2024 han las persunas interessadas la pussaivladad da s'exprimer davart las midadas planisadas per l'onn proxim.

Il sboz da l'urari per l'onn 2025 stat a disposiziun a partir dad oz sin www.öv-info.ch. El è vegnì elavurà durant ils ultims mais dal chantun Grischun ensemen cun las interpresas da transport e cun las regiuns. Fin ils 9 da zercladur 2024 è il sboz da l'urari en consultaziun tar la populaziun.

Tut las persunas interessadas han ussa la pussaivladad d'inoltrar ina posiziun. Ulteriuras infurmaziuns concernent la procedura d'urari chattais Vus sut www.aev.gr.ch/fahrplan. Las decisiuns, tgeninas da questas amplificaziuns da l'urari planisadas che pon vegnir finanziadas e realisadas en moda fidada, vegnan prendidas il pli tard il settember 2024.

Nov concept da bus en l'Engiadin'Ota ed ulteriuras adattaziuns tar la purschida da bus
En l'Engiadin'Ota vegn realisà in nov concept da bus. Cun il nov concept da lingias survegnan cunzunt las vischnancas sper ils lais sco er Puntraschigna in meglier access. Er la colliaziun tranter Milaun e l'Engiadin'Ota po uschia vegnir accelerada. Tut en tut profiteschan la populaziun ed ils giasts en l'Engiadin'Ota ed en la Bregaglia da colliaziuns pli concisas e da dapli colliaziuns senza midada da med da transport. Sin la lingia dal Pass dal Fuorn Mals/Malles – Val Müstair – Zernez vegnan optimadas las colliaziuns a Zernez, quai che reducescha ils temps da viadi per Landquart e per l'Engiadin'Ota. En il Signuradi vegn la purschida da l'auto da posta concentrada.

Introducziun dal tact da mes'ura Cuira – Glion il pli tard il december 2025
Il tact da mes'ura da la Viafier retica tranter Cuira e Glion vegn introducì il pli tard il december 2025. Ensemen cun quest tact da mes'ura èsi er previs d'augmentar las colliaziuns d'auto da posta en Surselva. Per fixar il mument exact da l'introducziun sto la planisaziun dal persunal da locomotivas tar la Viafier retica anc vegnir intensivada. Da quai dependa er l'augment da las colliaziuns d'auto da posta en Surselva, perquai che quests dus concepts èn colliads fermamain in cun l'auter.

In'ulteriura novaziun duai dar tar las Viafiers federalas svizras (VFF). Las VFF introduceschan novas colliaziuns da gronda distanza en il tact da mes'ura tranter il Grischun e Son Gagl. Uschia sa reducescha per exempel er il temp da viadi da Minca en il Grischun per 30 minutas a 3 uras e 24 minutas.

Infurmaziuns:

Sboz da l'urari: www.öv-info.ch

Infurmaziuns:

• Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, tel. +41 81 257 36 05 (cuntanschibla da las 10.00 fin las 11.00), e‑mail Carmelia.Maissen@diem.gr.ch
• Thierry Müller, manader da la partiziun Traffic public, Uffizi d'energia e da traffic, tel. +41 81 257 36 04 (cuntanschibel da las 10.00 fin las 12.00), e‑mail Thierry.Mueller@aev.gr.ch