Per incumbensa da las proprietarias e dals proprietaris da guaud fan ils manaschis forestals mintga onn ina gronda lavur a favur da la tgira dal guaud grischun. L'onn 2023 han els tgirà var 3550 hectaras guaud. En il center èn puspè stads la tgira dal guaud da protecziun ed il mantegniment da la biodiversitad.

Ils manaschis forestals e las interpresas forestalas publicas han tgirà l'onn passà 3546 hectaras da las totalmain 216 000 hectaras guaud en il chantun. La quantitad è restada constanta en cumparegliaziun cun las 3500 hectaras da l'onn avant. L'onn 2023 han ils manaschis utilisà 390 000 meters cubic laina. Quai èn var 4 pertschient dapli che l'onn precedent. Tenor il tagl chantunal annual pon vegnir utilisads en media 390 000 meters cubic laina per onn.

In augment hai dà tar la quantitad da laina ch'è vegnida allontanada pervia da donns. L'onn passà è quai stà trais giadas dapli laina terrada da stemprads, numnadamain 50 000 meters cubic. Quai correspunda ad in augment da 46 pertschient. Cumpareglià cun l'onn precedent èn ils donns chaschunads dal bau-scorsa dentant sa reducids per 40 pertschient.

Tgirà 2400 hectaras guaud da protecziun
Perquai che mo in guaud stabil e saun porscha la meglra e la pli favuraivla protecziun cunter privels da la natira, è la tgira dal guaud da protecziun er stada en il center l'onn 2023. L'onn passà èn vegnidas tgiradas circa 2400 da las var 122 000 hectaras guaud da protecziun dal Grischun. Questa surfatscha correspunda a la media dals onns passads. Sin circa 70 pertschient da las surfatschas tgiradas, pia sin 1750 hectaras, profitan las proprietarias ed ils proprietaris da guaud da contribuziuns da la Confederaziun e dal chantun da tut en tut 14,54 milliuns francs. Tut questas mesiras gidan er a mantegnair il guaud sco spazi da viver prezius per la selvaschina. A medem temp èsi er impurtant per il guaud da protecziun, ch'ins reduceschia l'influenza da la selvaschina sin la regiuvinaziun dal guaud. La Strategia spazi da viver guaud-selvaschina, deliberada l'onn 2021 da la Regenza grischuna, ha ina rolla centrala en quest connex.

Promover la biodiversitad forestala
La cunvegna da program Guaud cun la Confederaziun n'è betg mo decisiva per tgirar il guaud da protecziun, mabain er per mantegnair e per promover la biodiversitad forestala, per tgirar cun la crana a cabel guauds strusch accessibels ordaifer il guaud da protecziun sco er per tgirar il guaud giuven ordaifer il guaud da protecziun.
A favur da la biodiversitad forestala è vegnida tgirada l'onn passà ina surfatscha da guaud da var 370 hectaras; quai èn tuttina bleras hectaras sco l'onn precedent. La part principala da la tgira è stada la promoziun dals spazis da viver dal taus, suandada da la revalitaziun da guauds pasculads, da la promoziun da spezias da bostgaglia particularas e d'ulteriurs spazis da viver sco er da selvas da chastagners al sid da las Alps. .

Guaud giuven impurtant en vista a la midada dal clima
L'onn 2023 han las bostgeras ed ils bostgers tgirà 53 hectaras guaud giuven ordaifer il guaud da protecziun, quai èn 3 pertschient damain che l'onn avant. Questa tgira, cun la quala ins po influenzar la cumposiziun da las spezias da bostgs, è fitg impurtanta en vista a la midada dal clima. La dretga cumposiziun da las spezias da bostgs gida numnadamain a reducir las ristgas ed uschia ad augmentar la resistenza dals guauds envers ils privels da la natira.

Cun la moziun Fässler per Garantir ina tgira ed in'utilisaziun persistenta dal guaud han ins pudì tgirar l'onn passà 24 hectaras guaud (in pertschient da la surfatscha tgirada) ordaifer il guaud da protecziun. Questas intervenziuns han l'intent da meglierar la resistenza e la resilienza dal guaud envers la midada dal clima ed ils eveniments biotics ed abiotics respectivs.
Quai èn en spezial mesiras per promover las spezias da bostgs adattadas al clima, la diversitad da las spezias da bostgs e la structuraziun dals effectivs.

Participaziun a project da perscrutaziun
Il chantun Grischun sa participescha dapi l'onn 2020 al project «Emplantaziuns experimentalas da spezias da bostgs cun perspectivas per il futur» da l'Institut federal per la perscrutaziun da guaud, naiv e cuntrada. Cun 57 emplantaziuns experimentalas en tut la Svizra, 8 da quellas en il Grischun (Bravuogn, Bregaglia, Maiavilla, Val Stussavgia, Samedan, Casti, Val Müstair e Valsot), vulan la perscrutaziun e la pratica s'occupar da la dumonda, tge spezias da bostgs, che valan a la fin dal 21. tschientaner sco adattadas en in lieu, pon crescher gia oz en quest lieu.

Ils custs per preparar, per endrizzar e per mantegnair las surfatschas èn vegnids surpigliads cumplettamain da la Confederaziun e dal chantun. A las proprietarias ed als proprietaris da guaud n'èn betg vegnids adossads custs restants.

Fotografias agiuntadas:

Infurmaziuns:

Urban Maissen, selvicultur chantunal, Uffizi da guaud e privels da la natira, tel. +41 81 257 38 51 (cuntanschibel da las 10.00 fin las 11.30), e‑mail Urban.Maissen@awn.gr.ch