La
Regenza ha approvà quatter projects da sanaziun cunter canera en las
vischnancas da Seglias, da Tumleastga, da Lantsch e da Masagn. Tut quests projects sa basan sin l'obligaziun da sanar tenor la
legislaziun davart la protecziun da l'ambient da la Confederaziun, l'Ordinaziun
federala davart la protecziun cunter canera. Pervia dal surpassament da las limitas d'immissiuns exista in basegn da
sanaziun per tschertas vias en las vischnancas numnadas qua survart. II chantun e las vischnancas sco
proprietaris da las vias correspundentas èn obligads da realisar la sanaziun
cunter canera.
Il
project da sanaziun cunter canera da la vischnanca da Seglias cumpiglia la via
da Tumleastga entaifer ils cunfins communals da Seglias, quai davent da la punt
da l'Alvra fin a la plazza dal vitg e la Campistrasse davent da la plazza dal
vitg fin a la sortida ost dal vitg. En il rom dal project conceda la Regenza la
permissiun da reducir la sveltezza maximala generala dad 80 km/h sin
50 km/h respectivamain da 50 km/h sin 30 km/h.
En la
vischnanca da Tumleastga cumpiglia il project da sanaziun la via da Tumleastga
entaifer ils cunfins communals da Tumleastga, quai davent da Tumegl, Mulegns
(Tumleastga Nord) fin al mut da la furtga (Pratval Sid). La reducziun da la
sveltezza maximala signalisada da 60 km/h sin 50 km/h tar la tavla dal lieu
Rodels Nord sco er l'engrondiment da la zona da tempo 30 existenta a Rodels –
per 220 meters en il nord e per 90 meters en il sid – vegnan approvads da la
Regenza. Ultra da quai vegnan remplazzadas las cuvridas veglias dals trajects
da via che n'han oz anc betg ina cuvrida dal tip da standard AC8, e quai fin il
pli tard 5 onns suenter l'approvaziun dal project da sanaziun cunter canera.
Il
project da sanaziun da la vischnanca da Lantsch cumpiglia la via dal Güglia
entaifer ils cunfins communals da Lantsch, quai davent da Lai en il nord fin a
Vazerol en il sid sco er la via da Brinzauls davent da l'access a la via dal
Güglia fin a l'ur dal vitg. En il rom dal project conceda la Regenza la
permissiun da reducir la sveltezza maximala generala da 50 km/h sin
30 km/h, quai sin in traject da var 850 meters da la via dal Güglia
entaifer il vitg.
En la vischnanca
da Masagn cumpiglia il project da sanaziun cunter canera il traject da la via
da la Mantogna Dadens entaifer ils cunfins communals da Masagn, quai davent da
la Lochmühle (en il nordost da Masagn) fin a la sortida dal vitg en il sidvest
da Masagn. La reducziun da la sveltezza maximala da 50 km/h sin 30 km/h, ch'è
previsa sco mesira per reducir la canera, sin ina lunghezza da circa 210 meters
en il sectur Innerdorf da Masagn ha la Polizia chantunala disponì e realisà sin
dumonda da la vischnanca da Masagn gia ils 8 da november 2023, quai per motivs
da la segirezza dal traffic.