L'Uffizi da construcziun bassa dal Grischun renovescha la cuvrida da la cruschada Sommerau a Cuira sin ina surfatscha da 9600 meters quadrat. Quai è l'emprima sanaziun pli gronda dapi che la cruschada è vegnida surdada al traffic avant var 40 onns. Las lavurs da construcziun duran dals 16 da zercladur fin ils 26 da fanadur 2024 e vegnan fatgas mo la notg.

Di per di circuleschan passa 23 000 vehichels sur la cruschada Sommerau. En la Svizra Orientala è ella ina da las pli cumplexas cruschadas che vegnan regladas cun amplas da traffic. Suenter var 40 onns renovescha l'Uffizi da construcziun bassa dal Grischun (UCB) l'entira cuvrida da quest punct central da traffic. Tut en tut custa il project circa 2 milliuns francs.

Stretg urari durant las vacanzas da stad
Per minimar uschè bain sco pussaivel ils disturbis per il traffic vegni lavurà mo durant la notg. Durant var 6 emnas – da dumengia, ils 16 da zercladur, fin previsiblamain venderdi, ils 26 da fanadur – vegni mintgamai lavurà da las 20.00 fin las 05.00. Durant quest temp vegn il traffic reglà tras il persunal dal servetsch da traffic e – sche necessari – svià. Durant il di na datti naginas restricziuns per las persunas che fan diever da la cruschada; sco usità vegn il traffic reglà cun las amplas da traffic.

Survista da las lavurs
En in'emprima fasa vegnan exequidas las lavurs preliminaras per la sanaziun da la cuvrida sco tala. Per exempel vegnan sbassads ils viertgels dals tumbins existents, per ch'i resultia ina surfatscha senza obstachels per las lavurs da fresar che suondan. Plinavant vegnan reparads ils urs da la via ed ils craps da deflussiun da l'aua.

Suenter cumenzan las lavurs da cuvrida: En pliras etappas allontaneschan fresas var 7 centimeters da la cuvrida sin l'entira cruschada. Sin las parts fresadas vegnan mintgamai segnadas anc la medema notg marcaziuns provisoricas, uschia ch'il traffic po circular il di suenter senza restricziuns.

Medemamain en etappas vegn alura messa ina stresa da colliaziun da 5 centimeters grossezza e marcada provisoricamain sin l'entira cruschada. Durant questa fasa da construcziun vegnan er puspè auzads ils viertgels dals tumbins.

Suenter che questas lavurs èn terminadas, cumenza l'ultima fasa da la sanaziun da var 6 emnas: Quella cumpiglia la cuvrida finala d'ina grossezza da 3 centimeters e las marcaziuns definitivas. Er questas lavurs vegnan exequidas en pliras etappas.

Fotografias agiuntadas:

Infurmaziuns:

Ralf Hartmann, schef dal district 1 Cuira, Uffizi da construcziun bassa, tel. +41 81 257 57 01 (cuntanschibel da las 14.00 fin las 16.00), e‑mail Ralf.Hartmann@tba.gr.ch

Responsabladad: Uffizi da construcziun bassa

Infurmaziun per las collavuraturas ed ils collavuraturs da las medias: Visita dal plazzal da la cruschada Sommerau

Il UCB dat la pussaivladad a las collavuraturas ed als collavuraturs da las medias da visitar il plazzal sco er da far registraziuns ed intervistas cun la direcziun da construcziun al lieu.

Termin: mardi, ils 25 da zercladur 2024, da las 22.00 fin las 23.00.
Il UCB supplitgescha d'As annunziar en scrit fin mardi, ils 25 da zercladur, a mezdi, tar Ramona Tiefenthal, manadra Communicaziun, e‑mail medien@tba.gr.ch. Inditgai per plaschair Voss medium sco er il dumber ed ils nums da las participantas e dals participants. Ulteriuras infurmaziuns davart il lieu d'inscunter e davart il program survegnis Vus per e-mail suenter la scadenza dal termin d'annunzia.