Il project «egual21 – Plan d'acziun per l'egualitad en l'administraziun chantunala» sa chatta dapi il matg 2023 en la fasa da realisaziun. Il Post da stab per l'egualitad da las schanzas per dunnas ed umens ha preschentà a la Regenza in emprim rapport intermediar. En stretga collavuraziun cun l'Uffizi da persunal sco er ils posts da servetsch, ils secretariats dal departament e la Chanzlia chantunala vegnan realisadas numerusas mesiras ed activitads. L'onn 2026 duai egual21 vegnir evaluà e terminà.

Cun il project «egual 21 – Plan d'acziun per l'egualitad en l'administraziun chantunala» rinforza la Regenza in mund da lavur che promova l'egualitad e la cumpatibilitad e ch'è liber da discriminaziun. Uschia reagescha ella sin ina incumbensa dal Cussegl grond da l'onn 2019. Il project vegn manà dal Post da stab per l'egualitad da las schanzas per dunnas ed umens, quai en stretga collavuraziun cun l'Uffizi da persunal (UP).

Dapi il matg 2023 sa chatta equal21 en la fasa da realisaziun. Questa fasa è dividida en trais etappas che sa cruschan temporalmain: planisar, implementar ed integrar. En tut ils posts da servetsch, en tut ils secretariats dals departaments ed en la Chanzlia chantunala èn vegnidas nominadas persunas responsablas per realisar las mesiras. Quellas planiseschan e coordineschan ensemen cun la gruppa da project e cun la direcziun dal project egual21 la realisaziun da las mesiras en lur unitads administrativas. Actualmain èn planisadas totalmain 137 activitads concretas en las 39 unitads administrativas.

Differents plauns da la realisaziun
Il Plan d'acziun per l'egualitad cumpiglia quatter champs d'acziun: «models da lavur multifars», «recrutaziun e svilup da persunal», «cultura d'organisaziun», sco er «francaziun e structura». Per mintga champ d'acziun èn vegnidas definidas finamiras. Per cuntanscher las finamiras è vegnì elavurà in plan da mesiras. I dat quatter tips da mesiras:

• Mesiras surordinadas che pon vegnir realisadas en moda relativamain simpla e svelta tras il Post da stab per l'egualitad da las schanzas u tras l'Uffizi da persunal.
• Mesiras da pilot che vegnan elavuradas e realisadas en ed ensemen cun tscherts posts da servetsch.
• Mesiras che vegnan transferidas en la Strategia da HR e che vegnan realisadas tras l'Uffizi da persunal.
• Mesiras che pretendan adattaziuns a pli lunga vista en la structura organisatorica e/u processuala.

Gronda impurtanza da las mesiras surordinadas
La realisaziun da mesiras surordinadas mussa emprims success. Per cuntanscher tut las collavuraturas e tut ils collavuraturs èn dentant necessaris ulteriurs pass e mesiras da sensibilisaziun. Ultra d'in video explicativ davart la transparenza dal sistem da salari dovri perquai per exempel mesiras da sustegn supplementaras da derasar. «L'experientscha mussa, che bleras mesiras na pon betg vegnir resguardadas e realisadas en moda isolada», declera Barbara Wülser, manadra dal Post da stab per l'egualitad da las schanzas per dunnas ed umens. Las mesiras hajan pir effect en cumbinaziun cun autras mesiras ed activitads. Uschia organisescha il Post da stab per l'egualitad da las schanzas per dunnas ed umens er occurrenzas da colliaziun per sensibilisar per differentas sfidas da la cumpatibilitad u per divers connexs tranter ils models da lavur e l'egualitad.

Projects da pilot en planisaziun
En collavuraziun cun il Center UND che accumpogna egual21 dapi il cumenzament, è vegnì lantschà in project da pilot che ha l'intent da meglierar la vita professiunala ed ulteriurs secturs da la vita, nua che quai para difficil pervia da las cundiziuns generalas dal manaschi. En il focus stattan posts da servetsch cun ina gronda cumpart da collavuraturas e collavuraturs senza u cun pauca lavur da biro. Il spazi d'agir da prestaziun da talas persunas lascha tiers mo pauca libertad d'agir per la lavur mobila.

Strategia da HR sco ancra e garant per cuntinuitad
Las finamiras dal Plan d'acziun per l'egualitad èn stadas ina basa impurtanta per elavurar la nova strategia da HR per ils onns 2024 fin 2028. L'integraziun da mesiras d'egualitad en process è decisiva per francar a lunga vista l'egualitad. «Process da persunal èn regulaturs impurtants per promover l'egualitad e l'absenza da discriminaziun en organisaziuns», di il manader da l'Uffizi da persunal Marco Blumenthal. Per exempel duain vegnir discutadas en ils discurs annuals cun las collavuraturas ed ils collavuraturs en il futur er dumondas davart la cumpatibilitad, il mobing, la discriminaziun e mulestas sexualas al plaz da lavur, quai che vegn garantì tras l'integraziun en ils formulars da discurs respectivs. En la procedura d'extrada duain vegnir eruids ed evaluads en l'avegnir, ma anonima ils motivs d'extrada, cun in focus supplementar sin la cumpatibilitad. «Tras las lavurs preliminaras dal Post da stab per l'egualitad da las schanzas per dunnas ed umens cun egual21 avain nus pudì garantir ensemen cun l'Uffizi da persunal, che la nova strategia da HR «Cuminaivlamain per il Grischun» haja ina basa solida tras ina cultura vivida da l'egualitad da las schanzas e da l'absenza da discriminaziun en l'administraziun chantunala», accentuescha il president da la Regenza Jon Domenic Parolini.

La fasa da realisaziun dal Plan d'acziun per l'egualitad dura probablamain fin la fin da l'onn 2025. Cuntinuadas vegnan mesiras periodicas e talas che midan process existents. L'onn 2026 vegn evaluà l'effect dal Plan d'acziun per l'egualitad sin las cundiziuns da lavur e sin la cuntentientscha da las collavuraturas e dals collavuraturs a la lavur. A medem temp vegn il project egual21 terminà cun in rapport final per mauns da la Regenza.

Ulteriuras infurmaziuns davart «egual21 – Plan d'acziun per l'egualitad en l'administraziun chantunala»

Infurmaziuns:

• President da la Regenza Jon Domenic Parolini, schef dal Departament d'educaziun, cultura e protecziun da l'ambient, e‑mail Jondomenic.Parolini@ekud.gr.ch
• Barbara Wülser, manadra dal Post da stab per l'egualitad da las schanzas per dunnas ed umens, tel. +41 81 257 35 71 (cuntanschibla da las 09.00 fin las 11.00), e‑mail Barbara.Wuelser@stagl.gr.ch

Responsabladad: Regenza