La Regenza ha deliberà ina contribuziun chantunala a favur d'in project digital per sustegnair la realisaziun d'implants fotovoltaics alpins sin surfatschas libras. Ultra da quai ha ella prendì enconuschientscha d'ina petiziun che vul segirar la qualitad da la furmaziun en il Grischun.
Contribuziun chantunala a favur d'in project digital per sustegnair la planisaziun d'implants fotovoltaics alpins sin surfatschas libras
La
Regenza ha concedì ina contribuziun chantunala da maximalmain 122 000 francs a la ZENDRA SA per il project «ALPIN QUATTRO® Digital-Twin». Ella
ha deliberà questa contribuziun en il rom da la Lescha davart la promoziun da
la transfurmaziun digitala en il Grischun. Ils custs d'investiziun totals
importan 293 900 francs.
La
ZENDRA SA è ina joint venture grischuna che sa cumpona da la REECH SA
e da la X STATIK SA. En il rom da quest project ha ella l'intenziun
da sviluppar – ensemen cun la INFRADIGITAL SA sco «consorzi per implants
fotovoltaics alpins» – metodas, instruments e software per sustegnair la
planisaziun, l'acquisiziun, la producziun, la montascha, la fabricaziun, il
metter en funcziun ed il manaschi d'implants alpins sin surfatschas libras. En
il center vegn a star in schumellin digital che sustegna tut ils process da la
chadaina da valurisaziun. Cun in uschenumnà «minimum viable product» (MVP)
vegnan cumpigliadas las fasas da la planisaziun fin e cun la construcziun. Las
enconuschientschas dal MVP duain vegnir integradas en in project successiv, che
resguarda er ils ulteriurs process da la chadaina da valurisaziun. La
construcziun d'implants fotovoltaics alpins sin surfatschas libras e lur
process da fabricaziun èn da princip insatge nov. Il curt temp da construcziun
pretenda metodas da fabricaziun e da planisaziun da l'industria (just in time,
JIT) che duain vegnir applitgadas en la construcziun bassa speziala.
Il proceder cuntegna perspectivas tecnicas per
l'avegnir e po vegnir integrà en projects currents dal «Solarexpress» en il
Grischun. En vista a la topografia ed a las relaziuns specificas dal chantun
èsi raschunaivel da sviluppar cumpetenzas e schumellins digitals.
Ulteriuras infurmaziuns: https://grdigital.digital
La Regenza ha concedì ina contribuziun chantunala da maximalmain 122 000 francs a la ZENDRA SA per il project «ALPIN QUATTRO® Digital-Twin».
Prendì enconuschientscha d'ina petiziun che vul segirar la qualitad da la furmaziun en il Grischun
La Regenza ha prendì enconuschientscha da la
petiziun «per segirar la qualitad da la furmaziun en il Grischun». La petiziun
ch'è vegnida suttascritta da tut en tut 4200 persunas, è vegnida inoltrada ils
13 da mars 2024 a la Regenza. La petiziun vul che differentas propostas
vegnian examinadas en il rom da la revisiun parziala currenta da la Lescha da
scola ed integradas per gronda part en la revisiun da la lescha. La finamira è
quella da segirar la qualitad da la furmaziun en il Grischun cun porscher
avunda resursas e sustegn per persunas d'instrucziun bain scoladas.
Enconuschientscha da la petiziun
La Regenza ha prendì enconuschientscha da la petiziun «per segirar la qualitad da la furmaziun en il Grischun».
Entrada en vigur da la Lescha per promover la tgira da persunas malsaunas e l'assistenza da persunas attempadas e da persunas che basegnan tgira
La
Regenza metta en vigur la revisiun parziala da la Lescha per promover la tgira
da persunas malsaunas e l'assistenza da persunas attempadas e da persunas che
basegnan tgira sin il 1. da fanadur 2
024.
Cun las
midadas survegnan las instituziuns che porschan ina scolaziun pratica per il
persunal da tgira en il Grischun, da nov pli autas contribuziuns per la
scolaziun pratica. Plinavant pon persunas che absolvan ina scolaziun da tgira
ad ina scola spezialisada superiura u ad ina scola auta spezialisada en il
Grischun, far quint en l'avegnir cun dapli paja e cun contribuziuns da sustegn.
La Regenza metta en vigur la revisiun parziala da la Lescha per promover la tgira da persunas malsaunas e l'assistenza da persunas attempadas e da persunas che basegnan tgira sin il 1. da fanadur 2024.
