Blers giuvenils vegnan mulestads sexualmain en la rait. Quai po esser fitg engrevgiant. Co pon els sa proteger cunter talas mulestas? E nua chattan els agid? Questas ed ulteriuras dumondas dal 4. Parlament da mattas han represchentantas e represchentants da las scolas e persunas spezialisadas discutà a chaschun d'ina occurrenza da colliaziun a Cuira.

Bunamain la mesadad da tut ils giuvenils, oravant tut mattas, èn gia vegnids contactads ina giada d'ina persuna estra cun intenziuns sexualas nungiavischadas. Quai po esser, ch'i vegnan tramess maletgs nungiavischads cun cuntegn sexual ubain che persunas creschidas entran sistematicamain en contact cun uffants e giuvenils cun l'intenziun da far abus (cybergrooming). Per ils giuvenils pertutgads è quai savens ina grevezza psichica. Ultra da quai na san els savens betg, nua ch'els pon chattar agid.

Il november 2021 ha il 4. Parlament da mattas inoltrà la petiziun «Maletgs erotics nungiavischads e grooming» ed ha pretendì, ch'il sectur da las scolas popularas vegnia sensibilisà suffizientamain. En la sessiun da zercladur 2022 ha il Cussegl grond acceptà unanimamain la petiziun e la Regenza ha silsuenter incumbensà l'Uffizi per la scola populara ed il sport (USS) da sensibilisar las scolas popularas grischunas areguard las purschidas da sustegn ed areguard ils posts da consultaziun per scolaras e scolars.

Infurmar detagliadamain las scolas
En in emprim pass ha il Servetsch psicologic da scola dal USS tramess a tut las 5. classas primaras ils placats «Cybergrooming – mulestas sexualas en la rait». La campagna fa attent a la problematica ed als posts da consultaziun. En in ulteriur pass sensibilisescha il Servetsch psicologic da scola durant l'onn da scola current 2023/24 tut las direcziuns da las scolas e renda enconuschent las purschidas da sustegn existentas. Tuttas duas mesiras rinforzan las scolas popularas, per che quellas possian infurmar meglier las scolaras ed ils scolars.

Sco mesira supplementara han ins organisà ils 12 da zercladur 2024 in'occurrenza da colliaziun tematica per ils purtaders da las scolas regularas, per las instituziuns da la scolaziun speziala sco er per las persunas spezialisadas.

Persunas spezialisadas e la scola populara creeschan ina rait da contacts
Il champ tematic dals delicts sexuals en il sectur online pertutga blers acturs. Er il dumber dals giasts che han participà la mesemna passada a l'occurrenza da colliaziun «Proteger uffants e giuvenils da delicts sexuals da cyber» a Cuira exemplifitgescha quest fatg. Il program multifar ha dà l'occasiun a las participantas ed als participants da differents champs da lavur e d'activitad da discutar vastamain las propostas d'agir e las purschidas da sustegn.

Serdar Günal Rütsche, schef Cybercrime da la Polizia chantunala da Turitg, ha infurmà en ses referat introductiv davart ils differents privels e mussà, co ch'ins po proteger uffants e giuvenils da delicts sexuals da cyber. Corinne Rietmann dad Adebar, dal Post grischun per sanadad sexuala e planisaziun da famiglia sco er Marcel Trinkler, schef Prevenziun da la Polizia chantunala dal Grischun, han sco persunas spezialisadas chantunalas tematisà la situaziun en il Grischun e preschentà exempels concrets e purschidas da sustegn en il Grischun.

Agiunta:

Placat «Cybergrooming –mulestas sexualas en la rait»

Fotografia agiuntada:

Da sanestra a dretga: Georges Steffen (uffizi per la scola populara ed il sport), Marcel Trinkler (polizia chantunala dal Grischun), Serdar Günal Rütsche (polizia chantunala da Turitg) e Corinne Riedmann (adebar).

Infurmaziuns:

Georges Steffen, manader da la partiziun Servetsch psicologic da scola, Uffizi per la scola populara ed il sport, tel. +41 81 257 27 41 (cuntanschibel da las 14.15 fin las 15.00), e‑mail Georges.Steffen@avs.gr.ch