Il mars da quest onn ha la via da Calanca tranter Bivio Castaneda ed il spartavias da Buseno stuì vegnir serrada duas giadas preventivamain, quai per motivs da segirezza pervia da daratgadas. Grazia a las mesiras da segirada ch'èn vegnidas realisadas cun success en quest perimeter, abolescha l'Uffizi da construcziun bassa dal Grischun per immediat las serradas preventivas da la via.

Differents eveniments da la natira han en il passà adina puspè gì per consequenza, che la via da Calanca ha stuì vegnir serrada per motivs da segirezza – per part preventivamain. Las ultimas giadas è quai stà il cas ils 9 ed ils 31 da mars 2024. Sch'i vegniva prognostitgà plievgia da passa 50 millimeters precipitaziuns durant 24 uras pretendeva quai ina serrada preventiva – annunziada 3 dis ordavant – da la via da Calanca.

Aboliziun da las serradas preventivas grazia a la realisaziun da differentas mesiras
Per augmentar la segirezza ha l'Uffizi da construcziun bassa dal Grischun (UCB) planisà differentas mesiras ch'el ha realisà cun success en il decurs da las emnas passadas. Tranter auter han ins siglientà ed allontanà var 200 meters cubic crappa lucca e construì serras supplementaras cun bists ch'ins ha transportà natiers cun helicopters da gronda capacitad da chargia. Questas mesiras duain augmentar supplementarmain la segirezza sin la via. Uschia po il UCB abolir per immediat l'ordinaziun da serradas preventivas da la via en cas da daratgadas prognostitgadas. Mesiras a lunga vista – sco mantunar in rempar e spustar la via chantunala – vegnan actualmain elavuradas ed igl è prevesì da realisar ellas l'atun 2024.

En cas d'eveniments betg previsibels poi anc adina dar restricziuns a curta vista.

Videos:

Videos da la siglientada da differents tocs grip aut sur la via da Calanca pudais Vus chargiar giu sin nossa pagina d'internet.

Infurmaziuns:

Andrea Peduzzi, schef dal district 2 Mesauc, Uffizi da construcziun bassa, tel. +41 91 822 81 15 (cuntanschibel da las 11.00 fin las 12.00), e‑mail Andrea.Peduzzi@tba.gr.ch