Bainbaud cumenza la stad ed uschia er il temp da rimnar plantas selvadias. Per ch'il rimnar saja persistent e correct tenor las prescripziuns chantunalas, recumonda l'Uffizi per la natira e l'ambient da resguardar intginas reglas generalas. Las reglas fundamentalas èn resumadas en moda infurmativa en in fegl d'infurmaziun e sin placats. Il material d'infurmaziun vegn mess a disposiziun gratuitamain en pliras linguas a las vischnancas, las organisaziuns turisticas ed ulteriuras persunas interessadas.

Iva, giansauna melna, izun – plantas selvadias n'èn betg mo bellas da guardar, mabain er retschertgadas per auters motivs: Bleras persunas dovran flurs, ragischs u pumaraida per producir té dad ervas, vinars u per in dessert gustus. Qua na pon ins far naginas objecziuns – uschè ditg ch'ins respecta intginas reglas.

Pitschnas quantitads e naginas spezias da la Glista cotschna
Per ch'ina spezia da plantas survivia a lunga vista e per che sia diversitad genetica saja garantida, sto ella pudair prosperar, flurir e far sems en ses ambient natiral. Cleger plantas na dastga betg chaschunar l'extirpaziun d'ina spezia. Perquai dastgan mo vegnir rimnadas pitschnas quantitads e mo spezias fitg derasadas, uschia che lur plantadi na prenda nagin donn. I vegn recumandà da s'infurmar ordavant, sch'ina spezia è protegida u periclitada, respectivamain stat sin l'uschenumnada Glista cotschna u sch'il lieu da rimnada sa chatta en in territori da protecziun da las plantas. En quests cas n'èsi betg permess da rimnar plantas. Questas regulaziuns valan er per litgens e per mistgels.

Permissiun per rimnar per intents da gudogn
Tgi che rimna plantas u parts da plantas per producir per exempel liquors, products farmaceutics u cosmetics per la vendita u per allevar plantas d'iert per las vender, dovra ina permissiun chantunala (LPNP art. 19) che po vegnir dumandada tar l'Uffizi per la natira e l'ambient (info@anu.gr.ch). En cas da quantitads pli grondas vegni recumandà da cultivar las plantas selvadias enstagl da rimnar ellas. Medemamain èsi scumandà da rimnar bulieus per la vendita. Per il basegn privat valan las disposiziuns chantunalas da la protecziun dals bulieus.

Material d'infurmaziun en pliras linguas
Per vischnancas, organisaziuns turisticas e per ulteriuras persunas interessadas metta l'Uffizi per la natira e l'ambient a disposiziun material d'infurmaziun multifar en englais, talian e tudestg. Fegls d'infurmaziun e tavlas d'infurmaziun pon vegnir empustadas gratuitamain. Ultra da quai èn publitgadas sin la pagina d'internet sut la rubrica Promoziun da las spezias ulteriuras infurmaziuns davart rimnar plantas en moda persistenta.

Agiuntas:

Fegl d'infurmaziun «Rimnar persistentamain»
Tavla «Cleger persistentamain»

Fotografias agiuntadas:

Maletg 1 achillea moschata ssp erba-rotta (iva femna)

Infurmaziuns:

Marylaure de La Harpe, Partiziun Natira e cuntrada / Protecziun da las spezias botanicas, Uffizi per la natira e l'ambient, tel. +41 81 257 29 38 (cuntanschibla da las 13.30 fin las 17.00), e‑mail Marylaure.Delaharpe@anu.gr.ch