La Regenza ha deliberà il sboz tar ina revisiun parziala da la Lescha da taglia per il chantun Grischun per la consultaziun. Per distgargiar fiscalmain famiglias e persunas cun activitad da gudogn duain las deducziuns per uffants e l'import liber da taglia tar la tariffa da la taglia sin las entradas vegnir auzads. Percunter duai vegnir desistì d'introducir ina cumpensaziun legala da l'uschenumnada progressiun reala.

Il favrer 2023 ha il Cussegl grond acceptà l'incumbensa Hohl concernent distgargias fiscalas per famiglias e per persunas spezialisadas. Sco emprim pass ha el reducì durant la sessiun da december 2023 il pe da taglia chantunal per las persunas natiralas per 5 pertschient. Uschia vegn il chantun a distgargiar las persunas natiralas a partir da l'onn fiscal 2024 per totalmain 32 milliuns francs. En in segund pass duai vegnir revedida la Lescha chantunala da taglia per uschia distgargiar supplementarmain e sistematicamain famiglias e persunas cun activitad da gudogn. Per quest intent duain l'emprim vegnir sondadas las pussaivladads per talas distgargias. Il december 2023 ha il Cussegl grond er acceptà l'incumbensa Schneider concernent l'adattaziun da la progressiun reala. Cun quai ha el incumbensà la Regenza d'examinar ina futura cumpensaziun da la progressiun reala, e quai en il rom da la realisaziun da l'incumbensa Hohl.

Distgargia fiscala da famiglias cun auzar las deducziuns per uffants
Las deducziuns per uffants en il chantun Grischun èn vegnidas auzadas l'ultima giada il 1. da schaner 2010. Concernent l'autezza da las deducziuns per uffants è il chantun Grischun vegnì surpassà en il fratemp da vaira blers chantuns. Per sa posiziunar sco chantun attractiv per famiglias duain vegnir auzadas las deducziuns per uffants. La deducziun per uffants da la vegliadetgna prescolara duai vegnir auzada per 1000 francs sin da nov 7000 francs, la deducziun per uffants minorens pli vegls e per uffants en scolaziun u en emprendissadi per 1500 francs sin da nov 10 500 francs e la deducziun per uffants cun dimora ordaifer al lieu da scolaziun per 2000 francs sin da nov 20 000 francs.

Distgargia fiscala per persunas cun activitad da gudogn
Sco distgargia fiscala effizienta da per las persunas cun activitad da gudogn duain las taglias sin las entradas vegnir reducidas cun auzar l'import liber da taglia tar la tariffa da la taglia sin las entradas. En cumbinaziun cun la reducziun dal pe da taglia chantunal per l'onn fiscal 2024 duai l'augment da l'import liber da taglia tar la tariffa da la taglia sin las entradas mitigiar considerablamain la grevezza fiscala da las persunas cun activitad da gudogn. Concret èsi previs d'augmentar l'import liber da taglia tar la tariffa da la taglia sin las entradas per 1300 francs sin da nov 16 800 francs.

Questa revisiun parziala chaschuna – tar las taglias sin las entradas – annualmain in minus d'entradas da var 20 milliuns francs (senza taglias a la funtauna) per il chantun e da var 18 milliuns francs per las vischnancas. Quai correspunda a var 4,5 pertschient da las taglias sin las entradas dal chantun e da las vischnancas. Ensemen cun il minus d'entradas dal chantun da 32 milliuns francs pervia da la reducziun dal pe da taglia chantunal per 5 pertschient tar las persunas natiralas, resulta ina distgargia annuala da tut en tut 70 milliuns francs per las chasadas en il chantun. Uschia po l'attractivitad dal chantun Grischun vegnir meglierada en spezial per famiglias e per persunas cun activitad da gudogn.

Nagina introducziun d'ina cumpensaziun legala da l'uschenumnada progressiun reala
L'augment da las tariffas da taglia che vegn chaschunà da l'inflaziun, l'uschenumnada progressiun fraida, vegn cumpensada tar las taglias federalas, chantunalas e communalas. La part che resulta da l'augment da la capacitad da cumpra, la progressiun reala (chauda), na vegn oz percunter cumpensada sin nagin plaun statal. In'examinaziun da quest fenomen ha mussà cleramain, ch'i na dat nagin motiv per introducir ina cumpensaziun legala da questa progressiun reala en il chantun Grischun ed en las vischnancas grischunas. L'effect da la progressiun reala è adina puspè vegnì gulivà sin tuts dus plauns statals cun agid da revisiuns da la Lescha da taglia e cun agid da reducziuns dal pe da taglia, e temporarmain è el schizunt vegnì surcumpensà.

Ils documents da consultaziun èn ussa disponibels
La consultaziun dura dals 3 da fanadur 2024 fin ils 4 d'october 2024. Ils documents appartegnents pon vegnir consultads sin la pagina d'internet dal chantun Grischun. La debatta dal project en il Cussegl grond è previsa per la sessiun d'avust 2025. Las midadas duain entrar en vigur il 1. da schaner 2026.

Infurmaziuns:

• Cusseglier guvernativ Martin Bühler, schef dal Departament da finanzas e vischnancas, tel. +41 81 257 32 05 (cuntanschibel da las 13.00 fin las 15.00), e‑mail Martin.Buehler@dfg.gr.ch
• Angelo Roberto, manader da l'Administraziun chantunala da taglia, tel. +41 81 257 34 44 (cuntanschibel da las 8.00 fin las 17.00), e‑mail Angelo.Roberto@stv.gr.ch