Quest onn vegn il di da la festa naziunala festivà a Roveredo e San Vittore sco Bundstag. «Emprenda dal passà, viva en il preschent, prepara per il futur» – uschia descriva il motto dal Bundstag las numerusas activitads da festa che han lieu durant quatter dis.

Las duas vischnancas da San Vittore e da Roveredo èn s'unidas per festivar il Bundstag. Durant quatter dis han lieu differentas activitads cun in context statal, ecclesiastic ed istoric. Tut tenor il motto «Emprenda dal passà, viva en il preschent, prepara per il futur» vegni reflectà, filosofà, guardà en il passà e betg sco ultim festivà il preschent.

1. d'avust, l'avantmezdi a San Vittore, la saira a Roveredo
Las festivitads cumenzan il 1. d'avust a San Vittore cun in servetsch divin festiv e cun in cortegi. Suenter in salid dal cusseglier guvernativ Martin Bühler (a las 12.00) è la publicitad envidada ad in gentar cuminaivel. Per la festa dal 1. d'avust da la saira vegnan ils giasts envidads a Roveredo. Suenter ils pleds uffizials dal president da la Regenza Jon Domenic Parolini (a las 18.45) e dal president communal Gianpiero Raveglia vegn offrida ina tschaina a tut las persunas preschentas. I suondan ina preschentaziun da teater sco er in spectacul da glisch artistic, avant ch'il Bundstag va a fin cun il fieu tradiziunal dal 1. d'avust.

I vegn cusseglià da viagiar cun il traffic public. Grazia a la purschida «simpel per retour» pajais Vus ils dis dal Bundstag mo il viadi per ir a Roveredo / San Vittore. Il viadi da return è gratuit fin al lieu da partenza en il Grischun.

Ina tschavera medievala festiva cun divertiment, ils 2 d'avust, San Vittore
Il venderdi stat sut l'ensaina da spaisa, bavronda e divertiment. Tenor l'exempel medieval vegn la tschavera opulenta accumpagnada en moda divertenta da preschentaziuns da saut, trics magics, magliafieus ed ulteriuras attracziuns. Per l'occurrenza che cumenza a las 20.00 èsi necessari da s'annunziar sut 500annitreleghe@gmail.com.

Attracziuns per giuven e vegl, ils 3 e 4 d'avust, San Vittore
Animaziuns, teater d'uffants, martgà medieval, cortegi cun faclas sco avant 500 onns, divers concerts, teater da marionettas, turnier medieval e bler auter pli. Il grond dumber d'attracziuns ed ina survista detagliada dal program vegnan preschentads en l'agiunta.

Exposiziun ambulanta «Stgazis grischuns sin viadi» e spassegiada «Kultour»
Dals 30 da fanadur fin ils 8 d'avust 2024 è l'exposiziun ambulanta «Stgazis grischuns sin viadi» a Roveredo, Sótt i Nós. En il rom da l'exposiziun ha lieu ina spassegiada da Sendas grischunas al Museo Moesano. La tura divertenta cun la visita guidada dal museum permetta danovamain da sfunsar en il passà e d'emprender da quel per il futur.

Il program detaglià davart il Bundstag a Roveredo / San Vittore, l'exposiziun ambulanta e las spassegiadas «Kultour» chattais Vus sut https://500.gr.ch/rum/event/bundstag-roveredo-san-vittore. Ils 23 da fanadur 2024 a las 10.00 ha lieu en il Centro Regionale dei Servizi, via Giardinétt 2, Roveredo, ina conferenza da medias davart las festivitads. Collavuraturas e collavuraturs da las medias interessads èn envidads cordialmain.

Ulteriurs Bundstags e bleras activitads da giubileum
Ils Bundstags han lieu ils 20 da fanadur 2024 a Tavau, il 1. d'avust 2024 a Roveredo / San Vittore, il 1. da settember 2024 a Samedan, ils 7 da settember 2024 a Cuira, ils 14 da settember 2024 a Poschiavo ed ils 6 d'october 2024 en la Val Müstair.

Las numerusas activitads en tut las regiuns linguisticas pon vegnir consultadas da tut temp sut https://500.gr.ch/rum/.

Agiunta:

Flyer dal program dal Bundstag a Roveredo / San Vittore (en talian)

Infurmaziuns:

• Daniel Camenisch, manader dal project «500 onns Stadi liber da las Trais Lias», tel. +41 78 659 63 60, e‑mail camenisch@vinavant.ch

• Decio Cavallini, vice-president communal da Roveredo, tel. +41 79 758 95 91 (cuntanschibel da las 09.30 fin las 11.30), e‑mail d.cavallini@roveredo.ch