L'Uffizi da construcziun bassa dal Grischun dat puspè liber in vial da la via chantunala H13 tar Sorte per il traffic, quai a partir da venderdi, ils 26 da fanadur 2024, a las 18.00. Las restricziuns per il traffic da transit vegnan abolidas.
Grazia al grond engaschament da las collavuraturas e dals collavuraturs da l'Uffizi da construcziun bassa, da l'Uffizi da guaud e privels da la natira sco er da terzas interpresas stat a partir da venderdi, ils 26 da fanadur, puspè a disposiziun ina colliaziun nuninterrutta sin la via chantunala. Pervia da las lavurs da reparaziun che duran anc, vegn il traffic manà tar Sorte sin ina lunghezza da var 400 meters sin in vial e reglà cun agid d'ina ampla da traffic. Cun l'avertura da la via chantunala vegnan abolidas tut las restricziuns per il traffic da transit tranter Lostallo e Grono.
En cas da pli grondas precipitaziuns sa resalva l'Uffizi da construcziun bassa da serrar preventivamain la via, per la segirezza da las participantas e dals participants dal traffic.
Infurmaziuns actualas davart il stadi da las vias: strassen.gr.ch
Fotografia agiuntada:
La via chantunala a Sorte è puspè charrabla sin in vial.
Infurmaziuns:
Andrea Peduzzi, schef dal district 2 Mesauc, Uffizi da construcziun bassa, tel. +41 91 822 81 15 (cuntanschibel a partir da las 11.00 ), e‑mail Andrea.Peduzzi@tba.gr.ch
Responsabladad: Uffizi da construcziun bassa