Il Grischun duai sa metter ensemen cun otg chantuns e fundar ina instituziun cuminaivla che duai survegliar en l'avegnir las cassas da pensiun cun sedia en quests chantuns. Quai propona la Regenza al Cussegl grond.
Las instituziuns dal provediment professiunal (cassas da pensiun) cun sedia en il chantun Grischun vegnan oz survegliadas da la Surveglianza da la LPP e da las fundaziuns da la Svizra Orientala. En l'avegnir duai ina nova instituziun cuminaivla dals chantuns Turitg, Glaruna, Schaffusa, Appenzell Dadora, Appenzell Dadens, Son Gagl, Grischun, Turgovia e Tessin surpigliar questa incumbensa. Per quest intent èn ils chantuns sa cunvegnids ad ina cunvegna interchantunala.
En sia missiva propona la Regenza al Cussegl grond, ch'il chantun Grischun fetschia part da questa cunvegna. Las pretensiuns envers la surveglianza èn s'augmentadas considerablamain. Cun la nova instituziun èsi pussaivel d'ademplir vinavant questas pretensiuns. L'autoritad da surveglianza existenta duai vegnir abolida.
En il chantun Grischun pertutga questa midada las cassas da pensiun che han qua lur sedia. La surveglianza da las uschenumnadas fundaziuns classicas duai il chantun vinavant exequir sez. Dal rest propona la Regenza d'adattar tscherts puncts dal dretg chantunal. Il Cussegl grond vegn a tractar il project previsiblamain en la sessiun d'october (21 fin 23 d'october 2024).
Agiunta:
Missiva
Infurmaziuns:
Cusseglier guvernativ Martin Bühler, schef dal Departament da finanzas e vischnancas, tel. +41 81 257 32 05 (cuntanschibel da las 9.00 fin las 12.00), e‑mail Martin.Buehler@dfg.gr.ch
Responsabladad: Regenza