Per Svizras e Svizzers cun moda da viver nomada duai star a disposiziun ina purschida suffizienta da plazzas da transit e da staziunament. Per quest intent duain ils eventuals custs da l'agid social per questas persunas, che resultan a las vischnancas tras ina plazza da transit u da staziunament, vegnir repartids en moda gista sin tut las vischnancas. Cun la segunda missiva vegnan suttamessas al Cussegl grond novas reglas unitaras davart la restituziun da las prestaziuns d'agid social.
Tuttas duas revisiuns pertutgan disposiziuns ch'èn regladas en la Lescha davart il sustegn da persunas basegnusas (Lescha chantunala da sustegn, LS). Perquai che las duas revisiuns n'han uschiglio nagin context tematic, ha la Regenza deliberà duas missivas separadas.
Svizras e Svizzers cun moda da viver nomada: Repartiziun solidarica dals custs sin tut las vischnancas
La Regenza ha il giavisch da garantir a lunga vista ina purschida suffizienta da plazzas da transit e da staziunament en il chantun Grischun per Svizras e Svizzers cun moda da viver nomada. Uschia pon lur tradiziun e lur cultura vegnir mantegnidas. Eventualas prestaziuns da sustegn na duain però betg esser in criteri, cura ch'ina vischnanca decida, sch'ella duai porscher ina plazza da transit u da staziunament sin ses territori. Perquai èsi previs da reparter solidaricamain sin tut las vischnancas dal chantun ils eventuals custs da l'agid social per Svizras e Svizzers cun moda da viver nomada, che resultan ad ina vischnanca cun ina plazza da transit u da staziunament.
Las vischnancas che han ina plazza da transit u da staziunament per Svizras e Svizzers cun moda da viver nomada e che pajan en quest connex prestaziuns da sustegn, pon da nov far valair quests custs tar il chantun. Quel paja anticipadamain ils custs e reparta tals l'onn suandant a maun dal dumber d'abitants sin tut las vischnancas.
Restituziun da prestaziuns d'agid social: Regulaziun unitara
Cun l'autra missiva duain vegnir introducidas regulaziuns unitaras per la restituziun da las prestaziuns d'agid social. Tenor il dretg vertent sto la persuna sustegnida restituir l'agid social ch'ella ha retratg durant ils ultims 15 onns, sche sias relaziuns da facultad u d'entrada sa megliereschan. Tge ch'ins po chapir sut «meglierament da las relaziuns da facultad e d'entrada», n'è però betg reglà pli detagliadamain. Per quest motiv existan grondas differenzas en l'execuziun tras las vischnancas. Plinavant èn las excepziuns da la restituziun fin ussa regladas mo rudimentarmain. L'onn 2023 èsi resultà d'ina enquista da las vischnancas, ch'i dovra prescripziuns legalas pli precisas.
Cun la revisiun parziala concernent la restituziun vegnan stgaffidas reglas unitaras e cleras davart l'obligaziun da restituziun e las excepziuns latiers, per exempel per persunas giuvnas creschidas durant in'emprima scolaziun. Cun elavurar il project è la Regenza s'orientada a las Directivas da la Conferenza svizra da l'agid social (COSAS).
Il Cussegl grond vegn a tractar tuttas duas missivas previsiblamain en la sessiun d'october 2024.
Agiuntas:
Infurmaziuns:
Cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 44 60 (cuntanschibel per telefon da las 11.00 fin las 12.00), e‑mail Marcus.Caduff@dvs.gr.ch
Responsabladad: Regenza