Circa 19 000 scolaras e scolars cumenzan oz, glindesdi, il nov onn da scola en las scolas popularas grischunas. Il president da la Regenza Jon Domenic Parolini e la manadra da l'Uffizi per la scola populara ed il sport Chantal Marti-Müller han dastgà esser da la partida durant la festa d'avertura e l'arrivada da las scolaras e dals scolars da la 1. classa a Trimmis. Al cumenzament da la scola vegnan preschentadas las cifras actualas davart l'occupaziun da las plazzas da persunas d'instrucziun e davart la concessiun da permissiuns da dar scola. 

En la gronda part da las regiuns dal chantun Grischun cumenza oz l'onn da scola 2024/25. Per quest di spezial ha la scola da Trimmis organisà in program multifar e retschavì il president da la Regenza Jon Domenic Parolini sco er la manadra da l'Uffizi per la scola populara ed il sport (USS) Chantal Marti-Müller.

Suenter il bainvegni da la presidenta dal cussegl da scola Cilia Rohner Malär e da la manadra da scola Claudia Grehn han ils giasts sco emprim dastgà visitar l'instrucziun da la 2. classa reala e silsuenter giavischar in bun cumenzament a las novas scolaras ed als novs scolars da la 1. classa. Il punct culminant dal di è stada la festa d'avertura. Tut las scolaras ed ils scolars, las persunas d'instrucziun ed ils geniturs èn stads preschents durant l'arrivada da las scolaras e dals scolars da la 1. classa e dals uffants da scolina. «L'emprim di da scola è per las scolaras ed ils scolars sco er per ils geniturs, las persunas d'instrucziun ed ils purtaders da scola adina insatge tut spezial. Jau engraziel cordialmain a tuttas e tuts per lur engaschament che pussibilitescha a noss uffants ina via da furmaziun plain success», s'exprima il cusseglier guvernativ Jon Domenic Parolini.

Situaziun stabila tar las persunas d'instrucziun
Tenor las indicaziuns dals purtaders da la scola regulara eran il cumenzament da fanadur 2024 set plazzas betg occupadas per il cumenzament da l'onn da scola. Tut en tut correspunda quai a circa trais plazzas a temp cumplain. La situaziun da l'occupaziun da las plazzas da persunas d'instrucziun en il Grischun è pia stabila.

Per l'onn da scola 2024/25 èn vegnidas emessas tut en tut 530 permissiuns da dar scola per 515 persunas en il sectur da la scola regulara. Il sectur da la pedagogia speziala n'è betg resguardà en questas cifras. Quai correspunda ad in augment da 12 pertschient en cumparegliaziun cun l'onn da scola precedent. La gronda part da questas permissiuns da dar scola pertutga persunas d'instrucziun, che han bain in diplom d'instrucziun renconuschì, che n'instrueschan dentant betg sin il stgalim, per il qual ellas han in diplom. Per in temp limità po uschia ina persuna d'instrucziun da la scola primara dar scola sin il stgalim secundar I. Mintga settavla permissiun da dar scola vegn emessa per ina persuna d'instrucziun ch'è anc en scolaziun. In zic pli pauc ch'in quart da tut las permissiuns da dar scola vegn concedì a pedagogas e pedagogs curativs da scola da la promoziun integrativa. Var 80 pertschient da tut las persunas d'instrucziun che dattan scola han in diplom renconuschì che correspunda al stgalim ed instrueschan sin lur stgalim destinà.

La pli gronda part da las permissiuns da dar scola pertutga pensums pitschens
Il pensum da lavur d'ina persuna d'instrucziun cun ina permissiun da dar scola importa en media 11,6 lecziuns. Quai correspunda circa ad in pensum da 40 pertschient. Cumpareglià cun l'onn avant è quai minimalmain pli pauc. 43 pertschient da las permissiuns da dar scola pertutgan pensums pitschens cun main che 11 lecziuns. In tschintgavel da tut las permissiuns da dar scola vegn emess per pensums da 5 lecziuns u damain. Tut en tut lavuran var 75 pertschient da las persunas d'instrucziun cun ina permissiun da dar scola en in pensum parzial.

Stgars 1,5 pertschient da las persunas d'instrucziun dal sectur da la scola regulara instrueschan sco persunas spezialisadas senza ina scolaziun pedagogica, per exempel ina scrinaria il rom «art textil e tecnic» u in interpret ina lingua estra. Il pensum d'instrucziun da questas persunas spezialisadas correspunda tut en tut a 17 plazzas a temp cumplain. Questas cifras mussan, che bunamain tut las persunas d'instrucziun han ina scolaziun pedagogica e che la qualitad da la scola populara è uschia garantida.

Engraziament a las direcziuns da scola ed a las persunas d'instrucziun
Il Departament d'educaziun, cultura e protecziun da l'ambient e l'Uffizi per la scola populara ed il sport engrazian en quest lieu cordialmain a las direcziuns da scola per lur gronda lavur. Sut cundiziuns betg adina simplas èn ellas vegnidas d'occupar bain la gronda part da las plazzas da persunas d'instrucziun. Er in grond engraziament va a tut las persunas d'instrucziun che prendan per mauns conscienziusamain lur incumbensas e che procuran adina per ina buna instrucziun. Nus giavischain a tut las scolaras ed a tut ils scolars, a las persunas d'instrucziun, a las direcziuns da scola ed a las autoritads da scola in onn da scola plain plaschair d'emprender. «Jau ma legrel da vesair, che la scola populara grischuna ha tantas persunas spezialisadas cumpetentas e motivadas», manegia la manadra dal USS Chantal Marti-Müller.

Fotografia agiuntada:

Una fotografia sarà aggiunta qui il prima possibile.

Infurmaziuns:

• President da la Regenza dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01 (cuntanschibel da las 16.15 fin las 16.45), e‑mail Jondomenic.Parolini@ekud.gr.ch
• Dr. Chantal Marti-Müller, manadra da l'Uffizi per la scola populara ed il sport, tel. +41 81 257 27 50 (cuntanschibla ils 13 d'avust 2024 da las 14.00 fin las 15.00), e‑mail Chantal.Marti@avs.gr.ch