Ina premissa impurtanta per la decarbonisaziun è quella da remplazzar las funtaunas d'energia fossilas tras funtaunas d'energia regenerablas. Laina è ina tala funtauna d'energia regenerabla. In studi, ch'è vegnì fatg per incumbensa dal chantun Grischun, vegn a la conclusiun, ch'il Grischun na po betg cuvrir il basegn actual. Oz ston 40 pertschient da la laina d'energia vegnir importads.

Fin ussa na devi betg infurmaziuns e cifras fidadas davart l'utilisaziun da la laina sco funtauna d'energia en il chantun Grischun. En il center d'in studi da l'onn 2013 steva la bilantscha da l'utilisaziun e dal creschament modellà. Il studi ch'è ussa avant maun e che l'Uffizi per la natira e l'ambient (UNA), l'Uffizi da guaud e privels da natira (UGP) e l'Uffizi d'energia e da traffic (UEnTr) avevan laschà far, stima per l'emprima giada il potenzial da laina d'energia en il chantun, quai sin basa da process d'explotaziun reals e da las svieutas dals singuls manaschis forestals. Plinavant bilantschescha il studi l'import e l'export dal volumen da laina total. Ultra da quai vegn tractada la dumonda da la disponibladad da laina.

En il cas ideal 70 pertschient cun laina d'energia indigena
Actualmain na po il Grischun betg cuvrir ses basegn da laina d'energia cumplettamain cun laina indigena. Il chantun sto importar stgars 40 pertschient da ses consum total d'auters chantuns e da l'exteriur. Il consum total dal Grischun importa 400 000 meters cubics per onn. Er sch'i vegnissan realisads tut ils stabiliments d'elavuraziun da laina ch'èn planisads en il chantun Grischun e sch'i stess a medem temp a disposiziun dapli laina d'energia grazia a l'augment da las contribuziuns u dals pretschs da laina, stuessan tuttina anc vegnir importads stgars 30 pertschient da la laina d'energia d'auters chantuns u da pajais vischins. Quai vul dir: En il cas ideal pudessan 70 pertschient dal basegn vegnir cuvrids cun laina d'energia indigena.

L'introducziun da tagls da laina d'energia n'è betg ina soluziun persistenta e stabila. In effect limitond han en quest connex la furmaziun dals pretschs sin basa da l'economia da martgà, l'accessibladad dals guauds sco er las prestaziuns ecologicas dal guaud. In'explotaziun da laina persistenta sto adina vegnir resguardada sut l'aspect d'ina utilisaziun multipla optimala. L'explotaziun da laina sin plirs stgalims – partind dal tagl da laina en il guaud sur l'elavuraziun e l'utilisaziun da la laina en edifizis u en rauba da consum fin che la laina vegn la finala arsa – sto vegnir preferida envers l'utilisaziun directa da laina sco funtauna d'energia.

L'actuala Statistica forestala dal chantun Grischun cuntegna gia oz ils pli impurtants indicaturs da l'economia forestala e da laina dal Grischun. La circulaziun da laina po uschia vegnir mussada svelt ed en moda reala.

Enconuschientschas impurtantas per stabilir la chadaina da laina
Tut las mesiras en il sectur da l'economia d'energia e dal clima ston vegnir accordadas ina cun l'autra, per pudair implementar soluziuns cunvegnentas, persistentas ed economicamain supportablas. Ils resultats e las enconuschientschas dal studi «Potenzial da laina d'energia en il Grischun» èn perquai impurtants per stabilir la chadaina da laina, per sviluppar vinavant la Strategia chantunala da clima sco er per realisar il «Plan d'acziun Green Deal».

Agiunta:

Potenzial da laina d'energia en il Grischun

Auskunftspersonen:

• Georg Thomann, Uffizi per la natira e l'ambient, manader da la partiziun Protecziun tecnica e manaschiala da l'ambient, tel. +41 81 257 29 52 (cuntanschibel da las 15.00 fin las 17.00), e‑mail Georg.Thomann@anu.gr.ch
• Urban Maissen, Uffizi da guaud e privels da la natira, selvicultur chantunal, tel. +41 81 257 38 51 (cuntanschibel da las 10.00 fin las 11.00), e‑mail Urban.Maissen@awn.gr.ch
• Thomas Schmid, manader da l'Uffizi d'energia e da traffic, tel. +41 81 257 36 21 (cuntanschibel da las 15.00 fin las 17.00), e‑mail Thomas.Schmid@aev.gr.ch

Responsabladad: Uffizi per la natira e l'ambient / Uffizi da guaud e privels da la natira / Uffizi d'energia e da traffic